Disa pamje të publikuara nga kamerat e sigurisë së një hoteli në Pazar, që tregojnë një punëtor të Agjencisë së Shërbimeve Publike që vjen vërdallë koshit të plehrave, në Gjirokastër kanë hapur një debat për trajtimin e kafshëve endacake. Në rrjetet sociale janë hedhur pretendime se janë punëtorët e bashkisë që i helmojnë qëllimisht. Bashkia Gjirokastër reagoi sot në mëngjes duke thënë se kjo është e pavërtetë.
“NUK ËSHTË E VËRTETË që ne vrasim kafshët! PAMJET NUK TREGOJNË ASGJË! NE KEMI PËRKUSHTIM për mbrojtjen e kafshëve, respektojmë dhe mbështesim projektet dhe konventat europiane për mbrojtjen e tyre. KUSHDO QË KONSTATON abuzim me kafshët t’i denoncojë në Polici e Prokurori. Pamjet e publikuara në mos janë dashakeqësi për të dëmtuar Gjirokastrën, janë të nxituara dhe që sërish bëjnë dëm në perspektivën tonë zhvillimore”, thuhet në njoftimin e Bashkisë Gjirokastër.
Top Channel i dedikoi një kronikë rreth 2 minuta kësaj çështje. Gazetarja bisedoi me tre të rinj që flisnin për mosgjetjen e kafshëve. Me të dëgjuar, por pa dhënë më tepër fakte, ata shprehen se qentë dhe macet po i vret qëllimisht bashkia. Natyrisht që nëse ky akt provohet është plotësisht i qortueshëm dhe duhet adresuar te institucionet përkatëse, por interesante është edhe ana tjetër e këtij debati. Që zhvillohet pikërisht në një kohë pandemie kur humbasim përditë jetë njerëzish në spitalet Covid. Për disa ky debat është emancipim e sensibilitet për t’u patur zili, për një pjesë konsiderohet luks duke patur parasysh kohën e mallkuar që jetojmë. Edhe pse për hir të së vërtetës kafshët meritojnë të mbrohen dhe trajtohen në mënyrën e duhur. Kurrsesi s’mund të tolerohet dhuna ndaj kafshëve. Nëse vërtetohet se kush ka gisht në helmimin e kafshëve, sigurisht që duhet të mbajë përgjegjësi. Më poshtë kronika e TCH dhe video e publikuar në rrjetet sociale ku pretendohet se janë helmuar qentë.
©argjiroja.net