Greqia po përballet me një situatë të vështirë për shkak të zjarreve të shumtë. Pavarësisht përpjekjeve dhe mobilizimit kombëtar me forcat zjarrfikëse, duket se kjo gjendje nuk mund të kapërcehet vetëm. Argjirolajm.net mëson se kryeministri Edi Rama ka bërë një lëvizje të fundit, duke vendosur të dërgojë një skuadër me zjarrfikës nga Shqipëria për të marrë pjesë në operacionet e shuarjes së zjarrit në zonën pranë Selanikut.
Ndihma e Shqipërisë vjen në një moment kur tensionet mes Athinës dhe Tiranës janë rritur për shkak të burgosjes së Fredi Belerit. E megjithatë me këtë gjest të fundit, Rama kërkon të dëshmojë që Shqipëria është e vendosur të shkojë përpara dhe në këtë situatë të vështirë t’i gjendet pranë fqinjit të saj jugor. Skuadrat tona zjarrfikëse që do të shkojnë në Greqi janë pothuajse nga të gjitha qytetet kryesore të Shqipërisë. Ato do të dalin përmes pikës kufitare të Kapshticës.
Përgjatë së mërkurës pritet të ketë edhe një komunikim zyrtar për këtë akt të Shqipërisë. Mbetet për t’u parë se si do të pritet prej Greqisë ndihma modeste e Tiranës zyrtare. Kujtojmë që kryeministri Kyriakos Mitsotakis nuk i dërgoi një ftesë homolut të tij Edi Rama për darkën informale me krerët e shteteve të Ballkanit Perëndimor. Shkak sipas qeverisë greke ishte qëndrimi i Tiranës për burgosjen e Fredi Belerit, edhe pse kjo është një cështje që i takon sistemit të drejtësisë dhe s’ka të bëjë me ekzekutivin. Fredi Beleri ndodhet në burg prej 12 majit pasi akuzohet për blerje votash. ©argjiroja.net
