Në rast bllokimi të ri, kampionati nuk do të ndalet

Spektri i një bllokimi të ri bie në të gjithë Italinë, prej ditësh tashmë e ndarë në zona të ndryshme, në të cilat është caktuar një ngjyrë për t’u identifikuar, bazuar në indeksin e ashpërsisë, të përcaktuar nga numri i infeksioneve me koronavirus. Qeveria po përpiqet ta shmangë këtë “ilaç ekstrem” dhe shumë veta pyesin se çfarë do të ndodhte me Serie A, nëse ky skenar do të realizohej.
Një përgjigje e dha Paolo Dal Pino. Presidenti i “Serie A League” siguroi për vazhdimësinë e turneut: “Në rast të një bllokimi të ri kombëtar, Serie A nuk do të ndalet, por do të vazhdojë. Unë nuk shoh një arsye për ta ndaluar atë”. Dal Pino bëri gjithashtu një llogari të humbjeve që ka pësuar futbolli italian në këtë krizë, duke kërkuar kthimin e basteve në llojin e sponsorëve, që mund të përdoren nga klubet:
“Ne kemi humbur 600 milionë euro këtë vit, një humbje për shkak të masave të ndryshme kufizuese. Kemi kërkuar masa lehtësimi si në sektorë të tjerë. Çdo vit ne paguajmë një miliard euro si kontribute dhe për këtë arsye kërkojmë t’i rishohim kushtet e pagesës. Nga arka e shtetit nuk kemi kërkuar asgjë. Ne, gjithashtu, do të dëshironim rivendosjen e basteve në 24 muajt e ardhshëm. Elim inimi i këtij lloj sponsori, i cili ekziston në të gjithë Europën, na ka marrë shumë miliona. Ne i kemi shkruar qeverisë, megjithatë pa marrë asnjëherë një përgjigje për këtë. Kjo vlen edhe për Gravina”.
E mërkura do të jetë një ditë e rëndësishme për asamblenë, e cila, pothuajse me siguri do të dekretojë hyrjen e fondeve të reja në mbështetje të futbollit italian: “Unë mendoj se fruti është pjekur. Në muajt e fundit është bërë një punë shumë intensive, komiteti ka bërë një punë të shkëlqyeshme. E mërkura është një ditë kyçe. Është e shkëlqyeshme që Liga mund të ketë një partner për një sektor në vështirësi”.