Vijon të jetë i lartë numri i rasteve të reja të prekur me Covid 19 në Shqipëri. Burime të Argjirolajm.net thonë se gjatë 24 orëve të fundit janë evidentuar 68 raste të reja në mbarë vendin, mes tyre edhe një rast në qytetin e Sarandës. Ndërkohë që një ditë më parë ishin 55 raste. Tirana mbetet vatra më e rrezikshme e koronavirusit, me 35 raste të reja. 44 pacientë janë shëruar plotësisht, ndërkohë që janë shënuar 4 viktima. Në të dy spitalet Covid janë aktualisht të shtruar 110 persona, prej të cilëve njëri është i intubuar ndërsa 14 janë në reanimacion.
Më herët gjatë paradites ministrja e Shëndetësisë, Ogerta Manastirliu, publikoi pamje nga brenda Spitalit Infektiv, ku shihej qartë gjendja e rëndë që mbizotëronte aty. Mjekë e infermierë që vraponin për të dhënë ndihmë nga njëra anë dhe pacientë që rrënkonin nga ana tjetër. Sot është dita e parë që Ministria e Shëndetësisë ndryshoi kohën e raportimit ditor të rasteve të reja. Prej 4 muajsh këto të dhëna raportoheshin gjatë paradites ndërsa prej sot shifrat do të bëhen publike në orën 16:00.