Alket Rizai, është arratisur nga burgu i Domokos, Greqi, pasi kishte përfituar leje shpërblyese dhe dyshohet të jetë përfshirë në një plagosje me armë zjarri.
Sipas Protothema, Rizai ishte me leje shpërblyese që prej datës 7 shtator dhe duhej të rikthehej në ambientet e burgimit mëngjesin e kësaj të hëne, por ai nuk është paraqitur, duke u shpallur kështu zyrtarisht nga autoritetet greke si i arratisur.
Lidhur me dyshimet për përfshirje në plagosje, ngjarja ka ndodhur në një beach-bar në plazhin e Anavyssos, më 13 shtator.
Ngjarja la të plagosur dy persona, një 20-vjeçar grek dhe një 41-vjeçar pakistanez, ndërsa Policia Greke ka vënë në pranga pronarin 41-vjeçar të lokalit dhe bashkëshorten e tij 39-vjeçare, të akuzuar për dëshmi të rreme, pengim të drejtësisë dhe shtytje në armëmbajtje pa leje.
Sipas të dhënave të para hetimore, konflikti nisi kur muzika në beach-bar u ndërpre për shkak të orarit. Rizai dhe shoqëria e tij dolën nga lokali, ndërsa 48-vjeçari shqiptar u ndalua te makina e tij duke vendosur muzikë me volum të lartë. Pas një debati verbal me pronarin e biznesit, situata u përshkallëzua shpejt. Rizai dyshohet se nxori armën dhe qëlloi, paraprakisht në ajër, çka nxiti ndërhyrjen e një roje sigurie nga Afganistani, i cili qëlloi në drejtim të shqiptarit me armë zjarri.
Sakaq, nga ky konflikt u plagosën një 20-vjeçar grek dhe një 41-vjeçar pakistanez.
Alket Rizai është një emër mjaft i njohur në botën e krimit në Greqi, si dhe për dy arratisjet spektakolare me helikopter në vitet 2006 dhe 2009. Nga janari i vitit 2021 deri në shtator 2026, Këshilli i Burgjeve i kishte miratuar atij 16 leje daljesh.
