Dy gëzime në pak ditë. Pas suksesit të Shqipërisë në Serbi, feston edhe Kosova, me dardanët që triumfuan 0-1 në transfertë përballë Suedisë duke marrë një trepikësh të artë që i afron gjithnjë e më shumë më fazën “play-off”. Me 7 pikë në 4 ndeshje, Kosova renditet në vendin e dytë, plus 4 nga Sllovenia rivali i tyre më i afërt. Në Suedi u krijua një atmosferë fantastike në shkallët e stadiumit, ku me mijëra tifozë shpalosën flamurin kombëtar, ndërsa nuk mungoi as një banderolë me një mbishkrim unik: “Nuk jemi komb kosovar, lindim dhe vdesim shqiptar”.
Ashtu si në tribuna, edhe në fushë ekipi ishte “zjarr”, duke triumfuar me meritë ndaj një rivali që udhëhiqej nga dyshja Isak-Gyokeres. Dyshja më e shtrenjtë e Premier League u ndal në më shumë se një herë nga një “mur” si Muric. Golin 3 pikësh për Kosovën e realizoi Fisnik Asllani në minutën e 32-të.
Festa në fund ishte akoma më fantastike ku lojtarë dhe tifozë në kor nisën duke kërcyer dhe kënduar: “O sa mirë dhe qen shqiptar”. Ëndrra e çdo tifozi shqiptar tashmë është bërë edhe më madhe, pasi në Botëror, ose të paktën në fazën “play-off” pritet të kemi dy përfaqësuese, Shqipërinë dhe Kosovën, në sytë e çdo tifozi kuqezi, kjo është vetëm një pjesë e Shqipërisë së Madhe.
(BalkanWeb)
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
