Panik për startet në Formula 1, Norris alarmon: Bateria nuk mjafton

Ndryshimet në rregulloren e Formula 1 për vitin 2026 nuk kanë përfshirë vetëm inxhinierët, mekanikët apo drejtuesit e skuadrave, pasi edhe pilotët janë duke kaluar një fazë intensive mësimi. Për këtë arsye, testet në Barcelonë dhe ato që do të zhvillohen në Bahrejn do të shërbejnë gjithashtu për t’u përshtatur me makina që i detyrojnë të ndryshojnë mënyrën e drejtimit në F1. Xhejms Volvesh, drejtori i ekipit Uilliams, ka pranuar se tani konkurruesit duhet të përshtaten me “veprime jo natyrale”, siç është shpejtimi i plotë në një kthesë për të prodhuar energji elektrike. Disa pilotë nuk e pëlqejnë këtë stil makine, si Lando Norris, i cili i sheh të ngjashme me Formulën 2, ndërsa Oskar Piastri, shoku i tij i skuadrës te MekLaren, ka një mendim të ndryshëm.

NDRYSHIMET E MOTORIT TË RI – Kampioni aktual i botës paralajmëron tani për një ndryshim të rëndësishëm që vjen nga njësi e fuqisë. Tani makinat janë më hibride (55-45). Një nga gjeneratorët elektrikë, ai kalorik (MGU-H), është hequr, dhe tani ka vetëm gjeneratorin kinetik (MGU-K). Për më tepër, bateritë janë rritur nga 180 kuaj fuqi në 2025-ën në 480 kuaj fuqi në 2026-ën.

Norris thotë se kjo do të ndihet menjëherë që në fillim të garave dhe mund të krijojë kaos. “Do të jetë shumë më e vështirë”, përmbledh ai, ndërsa më tej shpjegon: “Më parë, turbo ruhej në një shpejtësi të qëndrueshme falë baterisë. Starti bazohej në një ndërveprim shumë të qetë midis fuqisë elektrike dhe asaj të motorit me djegie të brendshme. Nëse përdor baterinë për të ndihmuar në start, humb shumë energji që më pas të mungon gjatë pjesës tjetër të rrethit. Mund të marrësh një start më të mirë, por bateria do të shterojë edhe para se të arrish në kthesën 1. Kjo ndodh në disa pista, si në Meksikë”.

PËRSHTATU OSE “VDIS” – Prandaj, Lando paralajmëron se pilotët duhet të praktikojnë shumë startet gjatë testimeve në Sakhir, sepse ka rrezik për shumë probleme në debutimin e Kampionatit Botëror në “Albert Park” të Melburnit, cirkuit ku do të mbahet Çmimi i Madh i Australisë, gara e parë e sezonit. “Tashmë gjithçka është më e komplikuar me motorët e rinj. Problemi kryesor në nisje është të bësh që turbo të arrijë diapazonin e duhur përpara se të aktivizohet propulsioni. Bateria nuk ndihmon më për të mbushur boshllëqet. Për këtë arsye, pres të shoh shumë testime startesh gjatë testimeve në Bahrejn”, përfundon Norris.

© BalkanWeb