Nuk ka fitues në Gjirokastër ku Luftëtari u ndal nga Laçi në një ndeshje me dy fytyra. Nga një gol për çdo pjesë dhe çdo skuadër mjaftoi në sfidën e “Qytetit të Gurtë” ku ekipi kurbinas zhvilloi një ndeshje të kujdesshme dhe pothuajse perfekte në aspektin taktik për të mos dalë pa pikë që mund të rezultojë e artë në fund kur të bëhen llogaritë e sezonit. Ndryshe nga sa jemi mësuar deri në këtë pjesë të sezonit, skuadra gjirokastrite u tregua disi më e kujdesshme dhe kjo u pa qartë në fushën e lojës pasi sinjalin e parë të vërtetë e dha në minutën e 13 kur një pasim i pashpresë drejt Bregut rezultoi vendimtar për vlonjatin që dogji në sprint Fangajn duke fituar një 11-metërsh. I përhershmi Ramadani, ai që ndëshkoi Laçin edhe në ndeshjen e parë të sezonit, mori përsipër ekzekutimin. Finalizimi i mesfushorit shkodran rezultoi me fat sepse Selmani nuk mundi ta ndalte atë top.
Kurbinasit nuk u pajtuan dhe sinjalin e parë e dhanë me Lulajn që e ndali topin në shtyllë, ndërsa Roca në krahun tjetër tentoi golin e klasit. Skuadra e Sinellës shtoi një marsh më shumë në pjesën e dytë duke bërë ligjin në fushën e lojës. Fillimisht Vucaj dhe më pas Musai dhanjë sinjale shprese, ndërsa Bregu u ndal nga Selmani spektakolar. Jonuzi në krahun tjetër alarmoi gjirokastritët por pak sekonda më vonë i ndëshkoi me një goditje të devijuar nga Boyom.
Laçi i luajti 15 minutat e fundit me 10 lojtarë pas daljes së Lushnkjas, ndërsa Luftëtari nuk arriti të gjente forca për të kthyer avantazhin pavarësisht këmbënguljes edhe në adresë të kryesorit Sadiku për një tjetër 11 metërsh në minutat shtesë. Në këtë mënyrë, gjirokastritët mjaftohen me një pikë që ka aromën e humbjes në Gjirokastër ku i kishin të gjitha mundësitë për një 3 pikësh të artë në garën e mbijetesës.
