Dy ditë më parë grupimi i këshilltarëve PD-LSI në Këshillin Bashkiak Gjirokastër shkarkoi me shumicë votash sekretarin Semi Golemi, i zgjedhur në atë post si përfaqësues i PS-së. Po kështu u tentua edhe shkarkimi nga Këshilli i Qarkut i Armand Hilës dhe Shkëlqim Guçes. Vota përcaktuese në këtë rast ishte ajo e këshilltarit Gramoz Braho, nga Partia për Europianizim dhe Integrimin e Shqipërisë (PEISH), parti e cila mbështet komunitetin rom dhe egjiptian në vendin tonë.
Pra, në këtë rast Braho bashkoi votën e tij me PD-në dhe LSI-në. Më datë 1 prill të këtij viti, këshilltari i PEISH organizoi një takim në lagjen ‘Punëtori’ me banorë të cilët e kishin mbështetur në zgjedhje. Ata i kishin kërkuar të mos bashkojë votat me PD-në në Këshillin Bashkiak. Takimi ishte thirrur nga mbështetësit e PEISH dhe anëtarët e tjerë të komuniteti rom dhe egjiptian në Gjirokastër. Duke folur para tyre Gramoz Braho u premtoi se do të respektojë vullnetin e zgjedhësve të tij. Por 1 Prilli i këshilltarit të PEISH rezulton të jetë i gënjeshtër, ashtu siç është në fakt simbolika e kësaj dite. Në mbledhjen e fundit të këshillit bashkiak, ai mbajti qëndrim tjetër.
Ndryshe nga çfarë u kishte premtuar mbështetësve të tij në atë takim, bashkoi votën me PD-në dhe LSI-në, për të shkarkuar sekretarin e këshillit dhe dy këshilltarë të tjerë. Këto vendime grupimi PD-LSI do t’i kishte marrë më herët, por nuk bënin dot shumicën pikërisht për shkak të refuzimit të Gramoz Brahos për të qenë pjesë e tyre. Megjithatë Braho ndryshoi sërish qëndrim dhe bashkë me votën e tij PD-LSI u bënë sërish shumicë. Sigurisht që nuk është qëllimi të linçojmë këshilltarin e PEISH, por e vërteta i duhet thënë publikut. Gramoz Braho është pjesë e pazareve në Këshillin Bashkiak Gjirokastër, njësoj si këshilltarët e tjerë. Përfshi këtu edhe ata që u larguan drejt PS-së. Takimi i tij me mbështetësit në lagjen ‘Punëtori’, gjoja për të marrë mandat se çfarë qëndrimi duhet të mbante, ka qenë thjesht një farsë.
© ArgjiroLajm.net
