PD dhe LSI e Gjirokastrës nuk janë bërë bashkë vetëm në Këshillin Bashkiak të qytetit, aty ku tentuan të krijonin shumicën, por janë bashkë edhe kur shkojnë në takimet që thërrasin drejtuesit e dy partive opozitare. Kështu ka ndodhur edhe një ditë më parë në selinë blu në Tiranë gjatë takimit të përbashkët të thirrur nga Basha dhe Kryemadhi. Krerët e PD-së dhe LSI-së në Gjirokastër, Roland Bejko e Krenar Kulla, ishin krah njëri-tjetrit teksa Basha, Kryemadhi dhe Berisha flisnin për vijimin e aksionit opozitar. Sa i përket Gjirokastrës, Bejko ka qenë vazhdimisht i kujdesshëm për të theksuar se nuk ka një aleancë PD-LSI, edhe pse ka një seri aktesh publike që faktojnë të kundërtën. PD heziton të thotë se do të hyjë në zgjedhje bashkë me LSI-në nga frika se humbet mbështetjen e elektoratit të vet, i cili në shumicën e tij e refuzon një aleancë të tillë. Megjithatë zyrtarizimi i marrëveshjes është vetëm çështje kohe, ndërkohë që janë piketuar edhe bashkitë të cilat do të ndahen mes LSI-së dhe PD-së.
©ArgjiroLajm.net
