Libohova feston sot 74-vjetorin e Çlirimit nga pushtuesit nazifashistë. Në ceremonitë e organizuara me këtë rast merrte pjesë edhe ministrja e Kulturës, Mirela Kumbaro.
Bashkë me kryebashkiaken Luiza Mandi dhe qytetarë të tjerë libohovitë ajo bëri homazhe në varrezat e dëshmorëve. Duke folur për mediat, Kumbaro u shpreh se kjo ngjarje e shënuar në historinë e Libohovës është ndër të tjera edhe një moment reflektimi.
“Është një moment ku të gjithë reflektojmë për sakrificat e brezave në një moment të rëndësishëm siç ka qenë Lufta e Dytë Botërore dhe Shqipëria ka qenë krah vendeve aleate kundër nazifashizmit si një ndër ekstremet më të dhunshme të historisë botërore. Ne duhet të jemi krenarë që Shqipëria ka qenë në këtë aleancë. Është dhe një moment reflektimi për të kuptuar se ekstremizmat, qofshin ato majtas apo djathtas nuk janë asnjëherë të mira”, tha Kumbaro.
Në vijim të takimeve të saj në jug të vendit, Kumbaro u ndal në shtëpinë e lindjes së shkrimtarit Ismail Kadare në Gjirokastër, ku u zhvillua ceremonia e promovimit të librit të Musine Kokalarit “Jeta ime universitare”./ArgjiroLajm.net/
