Kryebashkiaku i Gjirokastrës, Flamur Golemi, ka bërë një reagim për aksidentin tragjik që ndodhi në Muzinë, ku humbën jetën 5 persona. Mes të tjerash ai zbulon se shoferi i furgonit, Bardhi Proda, që ndërroi jetë gjithashtu, është një i afërm i tij. Veç ngushëllimit Golemi bën apel për të udhëtuar me kujdes në rrugë. Më poshtë reagimi i tij i plotë.
“Pa fjalë nga çfarë ndodhi sot në Muzinë, ku sa hap e mbyll sytë u këputën 5 jetë në një aksident tragjik. Pesha e dhimbjes është e rëndë për këdo që dëgjon një lajm të kobshëm si ky. Shumë më shumë për mua që humba të afërmin tim, Bardhin, shoferin fatkeq që e bënte atë rrugë për gati 20 vjet e kurrë nuk bëri një gabim në timon. Hetimet do të zbardhin të vërtetën e ngjarjes, që me siguri do të harrohet si shumë të tjera. Por ajo që duhet përsëritur vazhdimisht e vazhdimisht nga të gjithë ne, është një apel i thjeshtë: Mos rrezikoni jetën tuaj kur jeni në timon dhe as të të tjerëve që kalojnë në rrugë. Thirrini mendjes, qoftë me shpejtësinë, parakalimet e gabuara apo deri te përdorimi i celularit. Ngushëllime familjes Proda, familjes Korçari dhe Fediaieva. Shërim të shpejtë edhe për vajzat që morën lëndime!”
