Pavarësisht zhvillimeve të aktualitetit apo problematikave të shumta sociale, diskutimi më i bujshëm i ditëve të fundit ka qenë një program televiziv në Top Channel i cili qysh në krye të herës u shqua për shfaqjet e turpshme që i servirte publikut.
Do të mjaftonte qasja në një nga rrjetet sociale për të kuptuar se reagimet janë nga më të ndryshmet dhe nga më të shumtat, ku në qendër është një ngjarje banale ku disa të rinj janë tallur me audiencën.
Ngjarje si këto i gjen rëndom kudo, përveç se këtë herë ndryshimi qëndron në faktin se janë ekranizuar.
Pas shumë takimesh në program, një vajzë me emrin Tea doli prej tij si çift me një djalë të quajtur Andi dhe ata i thanë publikut se duhen.
Disa ditë pas fejesës që televizioni kombëtar i shiti audiencës, vajza doli që ishte lidhur me dikë tjetër dhe po pushonte në Kosovë.
Të tre protagonistët e kësaj “historie dashurie” përfituan famë të menjëhershme nga programi, u përdorën për reklama të shumta dhe u marketuan nga media si modele që ndiqen nga shumë adoleshentë dhe të rinj.
Ata dhe produksioni zgjodhën të tallen duke përdorur famën e tejskajshme që u ofroi programi i cili nuk dihet se si ta quash pasi përveç dhunës, sherreve dhe debateve seksuale nuk ofron asgjë tjetër.
Megjithatë, kjo ndodhi ka mbushur rrjetet ku mjaft media dhe analistë po e diskutojnë si vlerë shoqërore ku në fund të fundit të gjithë e dinë se çfarë është dhe çfarë përfaqëson.
Thjesht në këtë rast, fenomeni është ekranizuar për të zënë në “kurth” audiencën./tema
