Drejtoria e Policisë së Qarkut Gjirokastër ka mangësi në infrastrukturën teknike për t’u përballur me krimin, në mënyrë të veçantë me fenomenin e kultivimit të kanabisit. Kështu thuhet në një kronikë të trasmetuar sot nga RTSH Gjirokastra. Si tregues për mungesën e infrastrukturës teknike jepet numri i automjeteve që kanë në dispozicion tre komisariatet; 62 makina. Ndonëse duhet thënë që s’ka një lidhje direkte mes efektivitetit të luftës kundër kanabisit dhe numrit të automjeteve që disponon policia.
‘Infrastrukturën do ta vlerësoja të mjaftueshme, por meqënesë është sezoni i bimëve narkotike, do ta konsideroja të domosdoshme ripërtëritjen e saj’, shprehet zëdhënësja e policisë së qarkut Gjirokastër, Olimbi Prifti.
Sigurisht që pjesa logjistike në Policinë e Shtetit është shumë e rëndësishme në luftën e saj me krimin, në një kohë kur ky i fundit po sofistikohet gjithnjë e më shumë, por kur vjen puna tek përballja me kanabisin, mbi të gjitha është çështje vullneti politik sesa punë makinash. Janë 62 apo 162 makina, kjo ka pak rëndësi në raport me vendosmërinë e qeverive për ta luftuar apo jo kultivimin e kanabisit. Në Shqipëri ne i kemi parë të gjitha qasjet e qeverive ndaj fenomenit të kanabisit.
Për Lazaratin ishte një vendim politik i qeverisë së PD-së për ta lejuar. E ka deklaruar në Kuvend ish-kryeministri Berisha. Më pas qeveria ‘Rama 1’ ndërhyri në Lazarat, por ‘mbylli sytë’ teksa kanabisi kultivohej gati në të gjithë vendin. Aktualisht kultivimi i kanabisit është shumë, sporadik gati i papërfillshëm duke e krahasuar me tre vitet e fundit, për shkak të vullnetit politik për ta frenuar këtë fenomen kriminal.
© ArgjiroLajm.net
