Drejtori i deritanishëm i Ndërmarrjes së Ujësjellësit në Gjirokastër, Bashkim Tola, u shkarkua pas gati dy vjetësh në krye të asaj ndërmarrje. Vendimi është marrë sot pas mbledhjes së bordit drejtues, por s’ka ende një komunikim zyrtar nga Bashkia Gjirokastër se përse u shkarkua Bashkim Tola, drejtori të cilin Zamira Rami e prezantoi me bujë të madhe kur shkarkoi gjithë terror e arrogancë Dashamir Qelin. A ka lidhje shkarkimi i Bashkim Tolës me performancën e tij në punë? Sigurisht që jo! Shpjegimi i kësaj lëvizje fshihet pas emrit të atij që i zuri vendin Bashkim Tolës.
Është Dhimo Kristidhi, i cili mban njëkohësisht edhe mandatin e këshilltarit nga radhët e LSI-së. Disa javë më parë pati zëra se ai do të largohej te grupi i PS-së. Të kapur nga frika se mos humbasin shumicën e brishtë në Këshillin Bashkiak, Zamira Rami dhe Vangjel Tavo spostuan Bashkim Tolën për të shpërblyer Dhimo Kristidhin. Në ditët që këto lëvizje të mundshme diskutoheshin në Gjirokastër, Kristidhit i është premtuar nga Tavo dhe Rami që të mos largohet nga LSI-ja pasi do t’i japin drejtimin e Ndërmarrjes së Ujësjellësit. Dhe këshu ndodhi. Aktualisht LSI dhe PD kanë 16 kshilltarë në Këshillin Bashkiak, ndërsa PS ka 15 këshilltarë. Në rast largimi të Kristidhit drejt PS-së, kjo e fundit bënte shumicën. Pra, Bashkim Tola është bërë ‘kurban’ nga Tavo e Rami vetëm për të ruajtur shumicën në Këshillin Bashkiak.
Por sikundër ne e kemi thënë më herët, PD-LSI kanë një shumicë të brishtë, që lëviz me vetëm 1 këshilltar. Në këtë kuptim Zamira Rami është e shantazhueshme nga secili prej 16 këshilltarëve të grupimit PD-LSI. Çdonjëri prej tyre mund t’i ushtrojë asaj presion duke e kërcënuar me largim në rast se nuk përfiton favore ekstra prej ‘tepsisë’ së Bashkisë Gjirokastër. Funksionoi me Dhimo Kristidhin. Sapo Tavo dhe Rami e kuptuan se ai po tentonte të largohej drejt PS-së, i vunë mbi tavolinë çelësat e ndërmarrjes së ujësjellësit. Nëse tenton të ushtrojë presion edhe dikush tjetër, me siguri që do të funksionojë, por se deri ku është limiti i plotësimit të kërkesave kjo varet nga Tavo dhe Rami.
©ArgjiroLajm.net
