Është përkujtuar këtë të mërkurë, me një ceremoni 25 vjetori i masakrës së Peshkëpisë, ku ngelen të vrarë dy ushtarakë shqiptarë dhe u plagosën disa të tjerë. Fatmir Shehu dhe Arsen Gjini mbetën të vdekur pasi u sulmua nga një bandë e armatosur greke në mesnatën e 10 Prillit të vitit 1994, ndërsa në repartin ku ndodhi ngjarja ndodheshin edhe 130 rekrutë të rinj të paarmatosur të cilët u mbajtën peng.
Në 25-vjetorin e kësaj ngjarjeje të rëndë, familjarë, qytetarë dhe pjesëtarë të formimit “Djemtë e Gjirokastrës” me anë të një peticioni kanë kërkuar edhe një herë zbardhjen e saj dhe vënien përpara drejtësisë të personave përgjegjës. Të njëjtën gjë ka kërkuar edhe prefekti i Gjirokastrës, Astrit Aliaj.
“Masakra e Peshkëpisë është një nga ato ngjarjet e rënda që nuk është hetuar asnjëherë plotësisht. Autorët, pjesëmarrësit dhe mbështetësit e saj ende sot jetojnë të lirë dhe të pashqetësuar. Zbardhja e kësaj ngjarje është detyrim në emër të drejtësisë për kapitenin Fatmir Shehu dhe ushtarin Arsen Gjini, është detyrim që historia të mos përsëritet. Rihapja e dosjes nga Prokuroria zgjon tek ne vendosjen e shpresës për vendosjen para drejtësisë të autorëve të kësaj ngjarje”, tha prefekti i Gjirokastrës, Astrit Aliaj.
Ngjarja e Peshkëpisë është regjistruar si një prej ngjarjeve më enigmatike të ndodhura përgjatë vijës kufitare me shtetin grek.
