Në Prefekturën Gjirokastër u zhvillua sot mbledhja e jashtëzakonshme e Komisionit të Planifikimit, Përballimit të Emergjencave dhe Krizave. Drejtori i shërbimit zjarrfikës, Kujtim Bizhga, teksa foli për rritjen e bashkëpunimit institucional, denoncoi një rast sa qesharak aq edhe serioz në të njëjtën kohë. Sipas tij oficerët e policisë rrugore në Gjirokastër, ndalojnë shpesh automjetet zjarrfikëse dhe u kërkojnë llogari punonjësve për rripin e sigurimit.
‘Dua të ngre një problem tjetër përsa i përket Policisë Rrugore, meqë kemi këtu edhe drejtorin. Oficerë të policisë rrugore, ndalojnë në qendër të qytetit automjetet zjarrfikëse duke i kërkuar rripin e sigurimit”, tha Bizhga.
Mendoni për një moment një automjet të shërbimit zjarrfikës që është duke shkuar me urgjencë në një vatër zjarri, ndërkohë befas ndeshet me oficerë të policisë rrugore që i kërkojnë llogari për rripin e sigurimit. Nuk është e qartë se mbi ç’bazë ligjore mund të ndalen automjetet zjarrfikëse dhe t’u kërkohet llogari punonjësve për rripin e sigurimit.
Policët ose e bëjnë nga padia ose s’kanë me ç’a shtyjnë kohën dhe tregojnë ‘muskujt’ me kolegët e zjarrfikëseve. Por është e sigurt që ndalime të tilla krijojnë vonesa të kota dhe pastaj ndodh ajo që është bërë normë në Shqipëri: Zjarrfikësja mbërrin gjithmonë me vonesë. Derisa kemi një denoncim publik nga shefi i shërbimit të PMNZH Gjirokastër, Kujtim Bizhga, me siguri që nuk jemi para ndonjë rasti të izoluar, por duhet të jetë kthyer në fenomen tek rrugorët e Gjirokastrës.
© ArgjiroLajm.net
