Kryeministri Edi Rama ka dalë në një konferencë për shtyp, për të folur për negociatat e këtyre ditëve të fundit, për t’u ulur në një tavolinë për bisedime me Lulzim Bashën.
Sipas tij, është e pabesueshme ajo që po ndodh, pasi Basha prej ditësh refuzon çdo bisedim.
“Stafi im ka ditë që kontakton me atë të Bashës, por pa sukses.
Kemi kontaktuar edhe me presidentin, por nisma e tij nuk po sjell efektet për uljen e Lulzim Bashës në tryezë.
Qendrimi i Bashës dhe PD-së është i pakuptueshëm dhe i papranueshëm.
Po ndodh ajo që nuk ka ndodhur kurrë më parë, opozita refuzon dialogun.
Qeveria lutet për dialog, ndërsa opozita e refuzon brutalisht, duke pasur frikë nga dialogu.
Ndaj unë i bëj thirrje Lulzim Bashës, mos ki frikë nga dialogu dhe mos e ço PD-në drejt humorës.
Mos shiko armiq aty ku nuk ka dhe mos nxit forcat që nuk ia duan të mirën Shqipërisë.
Ulu në tryezë, dhe nëse ke frikë nga unë, cakto modalitetet që do vetë.
Po do, cakto dhe njerëz të tjerë, kë të duash, vendin ku të duash, dhe kur të duash.
Vetëm mos u vono dhe mos na vono, sepse nëse fati yt politik nuk më intereson fare, ty dhe mua, socialistët dhe demokratët, gjithë shqiptarët, duhet të na interesojë siguria dhe qetësia e këtij vendi.
Numrin tim dhe të zyrës sime e ke, ndaj më merr kur të duash.
Por zgjedhjet nuk ke për t’i penguar dot kurrë, dhe as qeverinë nuk mund ta rrrëzosh dot kurrë, nëse nuk do populli”, tha Rama.
