I vetmi që ka dalë i buzëqeshur nga selia e Partisë Socialiste është ministri i Brendshëm Bledi Çuçi. Mësohet se Pandeli Majko dhe ish-ministri Fatmir Xhafaj janë parë të trishtuar në fytyrë, siç duket për numrat në të cilat i ka vendosur kryeministri Rama. Vetë Majko ka vendosur që të refuzojë vendin e 19-të, ndërsa Xhafaj ende nuk ka marrë një vendim. Pritet që emrat e 140 kandidatëve për deputetë të depozitohen në KQZ nga momenti në moment.
Por çfarë po ndodh sot?
Sot është afati i fundit për partitë politike që të dorëzojnë në Komisionin Qendror të Zgjedhjeve listat e kandidatëve për deputetë. Ndërkohë që PS dhe PD kanë paralajmëruar mbledhje dhe takime gjatë pasdites në selitë respektive, LSI ka ‘mbyllur punë’ me emrat që do të garojnë në 12 qarqe.
Vetë kryetarja Monika Kryemadhi, ka zgjedhur që të jetë në krye të tre qarqeve; Tiranë, Elbasan dhe Fier. Deri më tani Rama ka deklaruar zyrtarisht se do të kandidojë në Vlorë dhe Durrës, ndërsa Basha ka lënë çdo gjë për t’u zbuluar në momentin e fundit. Nga partitë e mëdha priten surpriza, e sidomos nga PS që ka bërë një proces plot tension me hyrje dhe dalje nga lista e garuesve./abc
