Kryeministri Edi Rama ka marrë pjesë mbrëmjen e sotme në festën e fshatit Vajzë të Vlorës, ku gjatë fjalës së tij, nuk munguan batutat dhe thumbat.
Rama tha se fjala e tij në këtë aktivitet ishte e papritur, pasi nuk ishte njoftuar se do të mbante fjalim.
“Për mua është e papritur sepse nuk isha i lajmëruar që do të thosha ndonjë gjë, por do të mundohem të mbijetoj”, u shpreh ai me humor.
Kryeministri falënderoi organizatorin e festës, Sokol Sadushin, që është kryetar i Gjykatës së Lartë, duke treguar se e kishte marrë ftesën për të katërtin vit radhazi, por këtë herë kishte vendosur të merrte pjesë.
“Dua të falënderoj Sokolin, i cili më dërgoi ftesën për të katërtin vit rresht. Dhe këtë herë nuk refuzova, duke qenë se tani më, siç e tha edhe gjyqtarja, e cila i uroj që gjykimi të ketë formën e prerë, 4 vjet janë mjaft për të pasur besim që ideja funksionon. Kështu që besoj që është rradha e duhur për të ardhur dhe për të dëshmuar, së bashku me të tjerët, suksesin e një ideje të lindur 4 vjet më parë”.
Gjatë fjalës, kryeministri përshëndeti edhe të ftuarit, mes tyre ish-Presidentin Bamir Topi, si dhe Prefektin e Tiranës, për të cilin tha me ironi se ndoshta ishte aty pasi ishin “miq të Vajzës”.
Batuta pati edhe për kreun e Komitetit Olimpik Kombëtar Shqiptar, Fidel Yllin, për të cilin Rama tha se deri para se të mbërrinte në aktivitet i rezultonte “nga Skrapari”, por shtoi me humor se edhe ai ishte “mik i Vajzës”.
Rama iu drejtua edhe kryetarit të Bashkisë Selenicë, Nertil Bella, duke e falënderuar për “promovimin për vajtjen e detit në majë të malit, me ujin e kripur bashkë”, në një tjetër batutë gjatë fjalimit.
Kryeministri përshëndeti gjithashtu ministrin e Pushtetit Vendor Ervin Demo, duke thënë se ndodhej aty për të parë se si funksionon Bashkia e Selenicës.
Në fund, Rama iu drejtua gjyqtares që kishte bërë prezantimin e aktivitetit, duke e falënderuar për fjalën e saj dhe duke komentuar me humor edhe veshjen e saj.
“Faleminderit shumë gjyqtares për këtë prezantim që ishte vërtet impresionues nga fillimi, plus edhe me këtë veshje që nuk është tipike për një person që ka kaluar vetting-un”, tha Rama, duke shkaktuar të qeshura dhe duartrokitje.
Kryeministri e mbylli fjalën me një tjetër batutë:
“Kështu që faleminderit të gjithëve edhe ju uroj që të keni një festival të këndshëm, edhe më shumë e më mirë vitin e ardhshëm. Por rëndësi ka që juve këtu pushtetin gjyqësor e keni me vete. Shumë faleminderit!”
