Kryeministri Edi Rama, i cili prej më shumë se dy orësh po zhvillon një podcast të gjatë së bashku me gazetaren Rudina Xhunga, ka komentuar për herë të parë edhe mënyrën se si i zgjedh ministrat.
Kreu i qeverisë tha ndër të tjera se lideri është fytyra e qeverisë dhe se ai mban përgjegjësi për çdo rezultat.
“Unë mendoj se sot, në çdo demokraci, lideri është fytyra identifikuese. Kjo është natyra e politikës. Kur vjen puna te fytyra publike, mbani mend ndonjë ministër të një lideri të madh si Obama apo Macron? Kjo është pjesa që shihet dhe është komplet ndryshe kur vjen puna te kontributet dhe si funksionon shumica”, deklaroi ai.
Sa i përket kritikave për zgjedhjen e ministrave, Rama tha se nëse je anëtar i PS-së dhe i strukturave drejtuese të saj, nuk je i informuar se po zgjidhesh anëtar i qeverisë, pasi, sipas tij, “je pjesë e formacionit”.
Po ashtu, kryeministri theksoi në postimin e tij se është ai “trajneri” që përcakton se kush do të “luajë” ose jo.
“Nëse janë anëtarë të Partisë Socialiste dhe të udhëheqjes së saj, nuk e dinë. Nëse nuk janë, patjetër që flas paraprakisht, ndërsa nëse janë pjesë e PS-së, janë pjesë e formacionit që e bën trajneri me lojtarët që janë në dispozicion. Nuk negocion trajneri: do luash ti apo s’do luash ti? Ata janë të gatshëm aty që të marrin detyra dhe, për sa kohë mua më kanë zgjedhur trajner, jam unë që e përcaktoj formacionin dhe s’ma përcakton njeri tjetër”, tha ai.
