Kryeministri Edi Rama ka folur në forumin Global Gateway për integrimin e Shqipërisë në Bashkimin Evropian. Rama në fjalën e tij, ka theksuar se martesa që vendi ynë do të bëj me BE-në do të jetë më e vështira, por sipas tij do të jetë ajo që vlen më shumë. Rama këtu ka marr shembull veten e tij, ku ka thënë se vetë ka pasur disa dështime me martesat, por pasi gjeti të duhurën është i lumtur. Po ashtu Rama ka theksuar se momentalisht ne marrim vetëm 138 euro për frymë ndërkohë që vendet që janë pjesë e BE-së marrin 4517 euro për frymë.
“Kjo është martesa më e vështirë, por që ja vlen. Unë kam pasur disa dështime në martesë, por pasi gjeta atë të duhurën e duke qenë i lumtur me të, unë besoj që kjo do të ndodhë edhe me Shqipërinë dhe të tjerët kur të martohen me BE. Dua që t’ju lë duke ju thënë një fakt të vogël sepse dua që ta dini që e gjithë buzëqeshja ime, e gjithë dashuria ime, gjithçkaja ime për Europën dhe Bashkimin Europian është pa kushte, por nuk është e pa mend. Vetëm mendoni, që ne rrethohemi nga kufijtë e BE dhe fqinjët tanë që janë BE marrin 4517 euro për frymë nga vetë Bashkimi Europian. Ajo çfarë marrim ne në E-në, pa B-në është vetëm 138 euro për frymë. Është një hendek shumë i madh që ne e mbushim me dashuri, që e mbushim me shpresë, që e mbushim me ambicie, që e mbushim me ide shumë të qartë që nuk ka asgjë më të mirë që mund të lëmë pas për fëmijët tanë, por shpresoj fort që ajo çfarë Presidentja e Komisionit dhe ky Komision po punojnë fort për të bërë, do t’ia dalin me sukses sepse në fund të fundit, fëmijët tanë nuk duhet të trashëgojnë vetëm testamentin e dashurisë, por edhe provën që kjo martesë është e vetmja që ia vlen të kesh”, tha Rama.
