Nga Fatos Bytyci dhe Edward Mcallister
Reuters i ka dedikuar një shkrim hetimeve të Prokurorisë së Posaçme mbi mënyrën se si është përfituar prona në Zvërnec, e shitur më pas për të ndërtuar një resort nga kompani të lidhura me Jared Kushner.
Duke cituar dosjen hetimore të SPAK, Reuters shkruan se hetimet ngrenë dyshime se pronësia e tokave është marrë përmes falsifikimit të dokumenteve dhe se autoritetet shqiptare janë në kërkim të biznesmenit Artur Shehu.
“Shehu ia shiti tokën në bregdetin e virgjër shqiptar për resortin e planifikuar kompanisë “Albania Land Development”, e cila është në pronësi të zhvilluesve të projektit të mbështetur nga Kushner, “Sazan Real Estate Development”, dhe investitorëve të tjerë. Dokumentet e SPAK thonë se Shehu e shiti tokën për projektin e resortit për rreth 110 milionë euro, fonde të cilat janë ngrirë në llogarinë e një noteri. “Shehu dhe bashkëpunëtorët blenë tokë duke përdorur fonde të fituara në mënyrë të paligjshme dhe falsifikuan dokumentet e pronësisë, duke krijuar tituj të rremë pronësie ose duke rritur artificialisht madhësinë e pronave”, thotë SPAK në dosje.
Megjithatë, agjencia e lajmeve shton se SPAK nuk ka hetime për Kushner apo bashkëpunëtorë të tjerë në këtë resort.
“Dosjet nuk ngrenë asnjë akuzë për shkelje ligji ndaj dhëndrit të Presidentit të SHBA-së, Donald Trump, Kushner, ndaj “Sazan Real Estate Development”, “Albania Land Development” apo investitorëve të tjerë në projektin e resortit. Reuters nuk gjeti asnjë indikacion se ndonjë prej investitorëve ishte në dijeni të dyshimeve ndaj Shehut kur e blenë tokën prej tij.”
Avokati i Artur Shehut, Kujtim Cakrani, mohoi, shkruan Reuters, akuzat e SPAK-ut, duke i konsideruar hetimet si të ndikuara, për sa kohë “besohej gjerësisht” se prokurorët shqiptarë vepronin nën ndikimin e politikanëve dhe figurave të biznesit.
