Pas 3 vjetësh rishfaqen problemet në pallatin 5-katësh në lagjen “Punëtori” në Gjirokastër. Sipas banorëve ka shkarje të tokës në pjesën e poshtme dhe çarje të betonit. Prefekti i Gjirokastrës Odise Kote, strukturat dhe kryetari i bashkisë, Flamur Golemi kanë marrë shqetësimin e banorëve dhe ndodhen aty për të parë situatën së bashku me një inxhinier. Janë rreth 15 familje që banojnë në këtë pallat 5-katësh pranë të cilit ka pasur rrëshqitje toke nga shirat e ditëve të fundit .
Rrëshqitja e dherave në Gjirokastër në fillim të vitit 2018 bëri që banorët të braktisin pallatin që rrezikonte të shembej. Asokohe, shkak për rrëshqitjen e dherave në lagjen ‘Punëtore’ u pretendua se janë bërë disa gërmime pranë një objekti dykatësh.
Pasditen e sotme në po të njëjtën datë por të vitit 2021 situata paraqitet shqetesuese pasi janë rishfaqur të tjera probleme serioze duke krijuar carje të reja të tokës si dhe shembjen e murit rrethues të një banese dy katëshe. Banorët janë shprehur se kanë frikë të flenë në banesa dhe kërkojnë ndërhyrje nga shteti.