Autorët e grabitjes së noterit Thoma Kaçi ende nuk janë kapur nga policia e Sarandës mirëpo është gjetur arma e tyre. Ngjarja ndaj noterit Kaçi ka ndodhur 7 ditë më parë, ku disa persona të maskuar dhe me armë vodhën një shumë parash. Autorët lidhën dhe dhunuan noterin derisa arritën të bënin të tyren shumën prej 20 mln lekësh. Policia sot ka dalë me një njoftim zyrtar, për të bërë të ditur se arma e zjarrit e përdorur në këtë ngjarje është gjetur. Arma është dërguar për ekzaminime të mëtejshme laboratorike në Institutin e Policisë Shkencore në Tiranë, me qëllim që të bëhet identifikimi me prova shkencore të dy autorëve të ngjarjes.
NJOFTIMI I POLICISË:
Vijon puna për zbardhjen e ngjarjes së ndodhur më datë 20.10.2021, ku persona të paidentifikuar dhe të maskuar, nën kërcënimin e armës dhe dhunës, vodhën një shumë parash në banesën e shtetasit Th. K. Si rezultat i veprimeve intensive hetimore, Policia ka gjetur dhe sekuestruar armën e zjarrit që dyshohet se është përdorur nga autorët.
Specialistët për Hetimin e Krimeve në Komisariatin e Policisë Sarandë, në bashkëpunim me strukturat hetimore të DVP Vlorë, pas një pune intensive hetimore për zbardhjen e ngjarjes së ndodhur më datë 20.10.2021, në lagjen nr.1, Sarandë, ku dy persona të paidentifikuar kanë hyrë në banesën e shtetasit T. K. dhe nën kërcënimin e armës i kanë vjedhur një shumë të konsiderueshme parash në lekë dhe euro, kanë bërë të mundur gjetjen dhe sekuestrimin e armës së zjarrit automatik që dyshohet se është përdorur në këtë ngjarje, si dhe një sasi municioni luftarak. Arma e zjarrit është dërguar për ekzaminime të mëtejshme laboratorike në Institutin e Policisë Shkencore Tiranë, me qëllim identifikimin me prova shkencore të dy autorëve të ngjarjes. Nën drejtimin e Prokurorisë, shërbimet e Komisariatit të Policisë Sarandë po vijojnë punën për identifikimin dhe kapjen e autorëve të ngjarjes. Materialet shtesë iu referuan Prokurorisë së Rrethit Gjyqësor Sarandë, për veprime të mëtejshme.
Ngjarja ndaj noterit ka ndodhur në orët e para të mëngjesit në datën 20 tetor. 2 persona të maskuar u futën në banesën e Thoma Kaçit duke lidhur 63-vjeçarin dhe familjarët e tij dhe pasi kanë marrë paratë dhe 2 çelësa makinash janë larguar.
