Në futboll ka skuadra që luajnë për rezultate dhe ka skuadra që dinë të fitojnë trofe. Egnatia duket se tashmë i përket kategorisë së dytë. Pikërisht në momentin më të rëndësishëm të sezonit, rrogozhinasit po tregojnë edhe njëherë atë që i ka shoqëruar vitet e fundit: mentalitetin kampion.
Sfida ndaj Vllaznisë konsiderohet si një tjetër provë force për skuadrën e drejtuar nga Nevil Dede, por në kampin rrogozhinas ekziston bindja se ndeshje të tilla janë pikërisht ato ku diferencën e bën karakteri. Dhe Egnatia e ka treguar dy herë radhazi se di të menaxhojë presionin në fundin e kampionatit.
FORMULA E KAMPIONËVE – Edhe pse formula e kampionatit ka ndryshuar në krahasim me dy vitet e fundit sa i përket fazës “Final 4”, një gjë ka mbetur e pandryshuar: Egnatia di të dalë fituese kur sezoni hyn në fazën finale. Dy herët e fundit, rrogozhinasit kanë arritur të shpallen kampionë pikërisht falë qetësisë, pjekurisë dhe aftësisë për të mos gabuar në ndeshjet që vlejnë më shumë.
Kjo është arsyeja pse në Rrogozhinë nuk shohin me frikë presionin e javëve të fundit. Përkundrazi, aty besojnë se eksperienca e fituar në sezonet e kaluara mund të jetë arma më e fortë në rrugën drejt një tjetër titulli. Futbollistët që kanë përjetuar ato suksese e dinë shumë mirë si menaxhohen këto momente dhe si fitohet kur pesha e rezultatit është maksimale.
NUK KA DY PA TRE – Brenda ambientit të Egnatias nuk thuhet hapur, por ideja është e qartë: “nuk ka dy pa tre”. Pas dy titujve të fituar në vitet e fundit, besimi se skuadra mund ta përsërisë historinë është më i madh se kurrë. Jo vetëm për cilësinë që ka grupi, por mbi të gjitha për mentalitetin që është krijuar në klub. Në javët e fundit është parë një Egnatia më e pjekur, më e qetë dhe më cinike. Skuadra duket se e ka kuptuar se tani nuk ka më rëndësi spektakli apo dominimi absolut në çdo ndeshje, por rezultati final. Kampionatet fitohen nga ekipet që dinë të vuajnë, të menaxhojnë emocionet dhe të fitojnë edhe kur presioni është maksimal.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
