Qeveria Shqiptare, përmes Autoritetit Rrugor Shqiptar, synon rivitalizmin e aksit rrugor Berat-Ballaban (Këlcyrë), duke planifikuar një ndërhyrje të thellë në gjurmën ekzistuese për t’a rikthyer këtë aks në funksion të plotë. Ky segment rrugor, me një gjatësi prej afro 60 kilometrash, prek katër bashki, Berat, Poliçan, Memaliaj dhe Këlcyrë dhe ju shërben afro 150 mijë banorëve. Ndërtimi i saj është një mundësi më tepër jo vetëm për të shkurtuar distancën dhe kohën e udhëtimit, Berat-Përmet e më tej në Gjirokastër, por edhe për të nxitur zhvillimin e turizmit në këtë zonë. Aksi rrugor Berat-Ballaban, Këlcyrë, do të transformohet rrënjësisht.
Depuetja e qarkut, Mirela Kumbaro, e pranishme në takim, tha se me ndërtimin e kësaj rrugë, zhvillimi i turizmit do të njohë një perspektivë tjetër në këtë zonë me pasuri të shumta natyrore dhe kulturore. Kumbaro përmendi gjithashtu edhe rrugë të tjera rurale që po ndërtohen aktualisht në qarkun Gjirokastër ose pritet të hapet kantieri, si rruga e Gusmarit, Lopësit dhe Përmet-Carshovë.
“Me këto investime krijohen disa unaza që ndihmojnë zhvillimin e turizmit. Ky aks që do të kalojë përmes Memaliajt dhe Këlcyrës nxit zhvillimin e turizmit në këtë zonë. Ballabani është sot i njohur për ofertën agroturistike. Lidhja e Beratit me Gjirokastrën do të krijojë një tendecë të re edhe për turizmin kulturor. Ky territor është me një potencial shumë të madh arkeologjik. Në segmentin Polican-Memaliaj, nëntoka është një minierë arkeologjike”, tha Kumbaro gjatë fjalës së saj.
©argjiroja.net
