Nga Mero Baze
Rruga Qukës–Qafë Plloçë është vërtet një projekt ekonomik i gabuar. Nuk është fjala se është i gabuar si lidhje alternative me Korçën, por si projekt inxhinierik. Është një projekt i miratuar nën qeverisjen e Sali Berishës dhe kompanitë janë përzgjedhur nën pushtetin e tij, kryesisht nën lobimin e ish-ministrit të Financave Ritvan Bode, që u pasua me po aq zell nga socialisti i ri më i rëndësishëm i qarkut, Niko Peleshi.
Projekti inxhinierik i nxituar dhe i përciptë bëri që, ndërkohë që punimet kishin filluar, të kuptohej se lotet nuk lidheshin me njëri-tjetrin dhe duheshin fonde shtesë.
Tani, meqë Belinda Balluku është në qendër të vëmendjes për shkak të përballjes me drejtësinë, shikoj që i janë turrur të gjithë asaj dhe për këtë projekt. Në këtë projekt Balluku është vrima e fundit e kavallit. Ai ka nisur nga Sokol Olldashi, ka vazhduar me Haxhinaston, Gjiknurin dhe Balluku është ministrja e fundit që ka pasur punë me të. Madje është ministrja që i dha fund një projekti të tmerrshëm që u kthye në gëlltitës fondesh.
Është pak a shumë si projekti i rrugës Tiranë–Elbasan, që Berisha e mbaroi shpejt e shpejt, pa projekt të saktë inxhinierik, dhe pastaj u deshën 50 milionë euro të stabilizohej rrëshqitja e Krrabës që nuk të lejonte të kaloje, vetëm se rruga ishte kaluar gabimisht në krahun e rrëshqitjes dhe jo përtej lumit.
Apo si projekti i rrugës Gjirokastër–Tepelenë, që nuk kaloi nga ana e Hormovës por përballë saj, dhe tani, siç e shikoni, rreth 2 km rrugë është e pandërtuar pasi pas çdo shiu rrëzohet një faqe mali në rrugë dhe duhet të zhvendosësh dheun. Është një betejë e humbur me terrenin për shkak të vendimeve politike dhe jo inxhinierike.
Defekte të tilla janë defekte projektimi, që i kushtojnë pastaj me miliona euro ekonomisë shqiptare. Në rastin e Qukës–Qafë Plloçë kësaj i shtohet edhe kotësia e projektit, i cili mund të ishte zëvendësuar me një rrugë rurale për zonën e Mokrës me një të dhjetën e këtyre shpenzimeve.
Mbi të gjitha këto projekte nuk dështojnë nga kompanitë ndërtuese. Kompanitë kanë përpara projektin dhe zbatojnë atë. Në rastin konkret, rruga ka kaluar në vendin më të gabuar të mundshëm, në një masiv të përzier mes argjilave, qymyreve dhe shkëmbinjve të copëtuar, që me pak shi kthehen në vullkan balte.
Ajo rrugë nuk qetësohet më nëse nuk devijohet ose nëse nuk zhduket tërësisht shpati përmes një fondi që do ta bënte edhe më të madhe gropën financiare.
Po të ishte gabim zbatimi, do ishte dëmi më i lehtë, pasi e zgjidhje me kompaninë ndërtuese. Problemi është tek projektimi i rrugës dhe akoma më keq tek ideja e ndërtimit të saj. Nëse do gjykosh atë, duhet të çosh para drejtësisë dy kryeministrat, Berisha dhe Rama, dhe gjithë ministrat e infrastrukturës që nga 2012 kur ka filluar procedura. Po deshët ta bëni këtë, bëjeni, por të gjithë që flasin janë pjesë e kësaj balte dhe gurëve që na kanë zënë rrugën. Edhe pse në modë këtë javë është të shash Ballukun./ TemA
