Një shtetas shqiptar 31-vjeçar është arrestuar në Mynih të Gjermanisë, i dyshuar për një sulm të rëndë ndaj një 29-vjeçari nga Kosova.
I riu kosovar kishte mbetur i plagosur rëndë në fillim të muajit shtator, ndërsa policia arriti të identifikonte dhe të ndalonte të dyshuarin pas gati dy muajsh hetime.
Sipas mediave gjermane që raportojnë sot, ngjarja ndodhi më 2 shtator 2026, rreth orës 01:55, në qendrën historike të Mynihut. Një 29-vjeçar me shtetësi kosovare, banues në rajonin e Starnbergut, u godit me një objekt të mprehtë në pjesën e sipërme të trupit.
Autori u largua nga vendngjarja, ndërsa i plagosuri iu nënshtrua një ndërhyrjeje kirurgjikale urgjente dhe arriti të mbijetonte.
Hetimet u morën përsipër nga njësia e specializuar për krimet kundër jetës. Pas mbledhjes së provave, prokuroria kërkoi arrestimin e një shqiptari 31-vjeçar me banim në Mynih.
Të enjten, më 29 tetor, rreth orës 07:00, policia e arrestoi të dyshuarin përpara banesës së tij, pa hasur rezistencë. Ai u dërgua para gjykatës dhe u la në paraburgim, nën dyshimin për tentativë vrasjeje.
Sipas hetimeve paraprake, dy personat nuk njiheshin më parë dhe sulmi dyshohet të ketë ndodhur pas një konflikti të çastit. Shkaqet e sakta nuk janë sqaruar ende.
Çfarë ndodhi më 2 shtator
Një 29-vjeçar shqiptar i Kosovës që jetonte në lagjen Starnberg sapo kishte mbaruar punën dhe ishte duke u kthyer në shtëpi në qytetin e vjetër të Mynihut pak para orës 2 të mëngjesit.
Ai vuri re një burrë dhe një grua që po grindeshin mjaft ashpër. 29-vjeçari donte të ndihmonte dhe u përpoq të ndërmjetësonte mosmarrëveshjen.
Burri që gjendej me femrën në krah papritmas nxori një thikë dhe e goditi. Tehu e kapi viktimën në pjesën e sipërme të trupit, tha një zëdhënës i policisë.
Çifti, i cili sapo ishte grindur ashpër, ikën me vrap së bashku në një drejtim të panjohur.
29-vjeçari telefonoi numrin e urgjencës së policisë. Një patrullë mbërriti në vendngjarje pak më vonë. Për fat të mirë, oficerët e policisë ishin të pajisur me kuti për urgjencë mjekësore.
Një ekip mjekësor i urgjencës e transportoi 29-vjeçarin në spital, ku ai iu nënshtrua një ndërhyrjeje kirurgjikale urgjente po atë natë. Sipas një zëdhënësi të policisë, burri nuk është më në gjendje kritike.
