Kreu i Këshillit të Qarkut, Arman Hilaj, për të cilin një ditë më parë Roland Bejko kishte thënë se ai pas shkarkimit nuk është më në atë post, ka reaguar sot përmes një deklarate së bashku me kolegët Shkëlqim Guçe e Petrit Brahimi. Ndonëse s’e përmendi me emër Roland Bejkon, Hila tha se ai ka dështuar në Gjirokastër bashkë me partinë që drejton.
“Dolëm sot për të sqaruar opinionin publik për disa disinformime të një partie të rrënuar siç është PD, e cila ka nesër protestën e radhës, një tjetër protestë e dështuar. Kanë dështim total edhe ata që e përfaqësojnë Partinë Demokratike në Gjirokastër, që sa herë votojnë aq herë dështojnë. Ky do të jetë dështimi i radhës me ta në këtë beteje ligjore në Bashkinë e Gjirokastrës”, u shpreh Hilaj.
Një ditë më parë grupimi PD-LSI tentoi të shkarkonte Shkëlqim Guçen dhe Armand Hilajn, por ndonëse Bejko pretendon se ata u shkarkuan, dy prej këshilltareve të LSI-së; Monda Kllapi dhe Vjollca Koko, u shprehën se nuk kishin votuar pro kësaj kërkese. Pritet që çështja të shkojë në Gjykatë.
©ArgjiroLajm.net
