Në Madrid, prej vitesh, nga tifozi më i thjeshtë dhe deri te presidenti Perez, të gjithë ëndërronin transferimin e Kylian Mbappe. Bosi i Realit bëri gjithçka për të siguruar kartonin e “gjelit” më të famshëm, por gjërat nuk shkuan ashtu siç të gjithë parashikonin. Me Mbappe në formacion, Reali po shkon drejt sezonit të dytë radhazi pa trofe, një përfundim i hidhur që ka tërbuar presidentin Perez.
Në shifra, Mbappe jo vetëm që nuk është një bekim, lojtari që të gjithë mendonin se do të pasonte trashëgiminë e Ronaldo-s, por fusha po vërteton totalisht të kundërtën. Ndaj Bayern Munich ishte ndeshja e katërt radhazi që Real Madrid nuk arriti të fitojë, për ironi të fatit apo jo, kjo ishte ndeshja e katërt që Mbappe ishte rikthyer në formacion. Ajo që rendon edhe më shumë është fakti që Reali pa Mbappe kishte fituar 5 ndeshje radhazi. Rastësi ose jo, këto janë fakte, në shifra, Reali nuk fiton dot me Mbappe në formacion.
Së fundmi, edhe vetë francezi e pranoi se një tjetër sezon pa trofe është një dështim për një ekip si Real Madrid: “E provuam deri në fund, por nuk mjaftoi. Është zhgënjyese të eliminohesh nga një turne i tillë, kaq i rëndësishëm, por duhet të shohim përpara. Duhet të analizojmë me kujdes se çfarë ndodhi për të evituar në të ardhmen një tjetër zhgënjim, por ne nuk do të dorëzohemi kurrë. Në Madrid dështimi nuk ka qenë dhe nuk do të jetë kurrë një opsion. Ju premtojmë vetëm një gjë, do të rikthehemi të fitojmë shumë shpejt”, shkruan Mbappe në një postim në Instagram.
