Deputeti i Partisë Demokratike, Tritan Shehu, ka reaguar kundër ndryshimeve të propozuara në reformën administrativo-territoriale, duke e konsideruar procesin një “anti-reformë” që, sipas tij, prek rëndë Qarkun e Gjirokastrës.
Në reagimin e tij, Shehu ngre shqetësimin për fatin e tri bashkive të qarkut, Libohovës, Memaliajt dhe Këlcyrës, të cilat sipas projektit të ri territorial parashikohet të bashkohen përkatësisht me Gjirokastrën, Tepelenën dhe Përmetin.
“Nesër nis akti i fundit i një anti-reforme që godet rëndë Qarkun e Gjirokastrës”, shprehet Shehu, duke argumentuar se ndryshimet e propozuara rrezikojnë të prekin jo vetëm organizimin administrativ, por edhe identitetin dhe perspektivën e zhvillimit të këtyre komuniteteve.
Sipas deputetit demokrat, me ndryshimet e propozuara rrezikojnë të preken “identitete, tradita, histori e kontribute qindravjeçare”, ndërsa ai paralajmëron edhe pasoja që, sipas tij, mund të shtrihen në ekonomi dhe në perspektivën e zhvillimit të të gjithë qarkut.
Shehu e paraqet kundërshtimin si një çështje që tejkalon ndarjet partiake.
“Kjo nuk është çështje partie, është çështje demokracie e zhvillimi!”, shkruan ai, duke pretenduar se kundër ndryshimeve janë shprehur qytetarë me përkatësi të ndryshme politike, si edhe këshillat bashkiakë të tri bashkive.
Reforma e propozuar administrativo-territoriale synon reduktimin e numrit të bashkive në vend nga 61 në 46. Në Qarkun e Gjirokastrës, harta e propozuar parashikon bashkimin e Libohovës me Gjirokastrën, Memaliajt me Tepelenën dhe Këlcyrës me Përmetin.
Kundërshtime ndaj shkrirjes së bashkive janë shprehur edhe nga drejtues vendorë. Kryetari socialist i Bashkisë Libohovë, Leonard Hide, ka deklaruar më herët publikisht kundërshtimin ndaj shkrirjes së bashkisë dhe ka kërkuar nga deputetët e qarkut të mbrojnë vijimin e ekzistencës së saj si njësi më vete.
Në një reagim të mëparshëm në kuadër të procesit parlamentar, Shehu ka kundërshtuar gjithashtu mënyrën e zhvillimit të reformës, duke argumentuar se ajo duhet të mbështetet në bashkëpunim politik dhe në një proces bipartizan.
Ndërsa procesi parlamentar hyn në fazën vendimtare, debati për të ardhmen administrative të Libohovës, Memaliajt dhe Këlcyrës mbetet një nga çështjet më të ndjeshme për Qarkun e Gjirokastrës.
Në përfundim të reagimit të tij, Tritan Shehu u bën thirrje qytetarëve që të shprehin qëndrimin e tyre ndaj reformës, duke theksuar se këto bashki, sipas tij, nuk janë thjesht njësi në hartën administrative të vendit, por përfaqësojnë histori, identitet dhe komunitete.
