Libohova është një prej 16 bashkive që do të shkrihen. Kryebashkiaku aktual, Leonard Hide, prej disa kohësh e kundërshton këtë propozim të mazhorancës socialiste. Teksa sot u votua ndarja e re territoriale në Komisionin e Ligjeve, vetëm me votat e deputetëve të PS, Hide ka reaguar sërsish në Facebook.
JO VENDIM NË EMRIN TIM.
Sot, Komisioni i Ligjeve votoi. Mazhoranca pro, opozita kundër. Të gjithë folën në emër të komunitetit dhe kryefjala ishte e njëjtë: ofrimi i shërbimeve sa më pranë njerëzve.
Po, sot folët në emër të komunitetit. Dhe natyrisht, në emrin tim. Por po jua them troç: mos flisni në emrin tim. Sepse pas fjalëve dhe pas kartonëve që do të ngrihen, nuk ka thjesht një vendim administrativ. Ka njerëz. Ka familje. Ka histori. Ka të moshuar, fëmijë, të rinj. Ka sy që mund të lotojnë, sy që mund të gëzohen dhe sy që mund të tremben.
Prandaj, para se të ngrini kartonat, kujtoni peshën e madhe që do të mbani mbi supe. Nëse vërtet flisni në emër të komunitetit, atëherë dëgjojeni komunitetin. Mos i hiqni njerëzve shpresën. Përkundrazi, jepuni shpresë dhe tregoni atë empatinë që kërkohet prej atyre që vendosin për fatin e të tjerëve. Sepse një karton ngrihet për një sekondë. Por pasojat e tij mund të zgjasin një jetë.
