Rreth një vit pas shkrirjes së 7 ujësjellësave të bashkive të qarkut Gjirokastër në një shoqëri të përbashkët rajonale, ku shumicën e aksioneve e ka Ministria e Infrastrukturës dhe Energjitikës, pritet të ketë dhjetra shkurtime të vendeve të punës. Në strukturën e re të miratuar së fundi nga kjo shoqëri bashkë me buxhetin e vitit 2024, janë parashikuar edhe largimi nga puna i 43 punonjësve. Synimi është për të reduktuar shpenzimet për paga e për të rritur eficencën e shoqërisë.
Njësia e Bashkisë Gjirokastër është ajo që preket më shumë me 12 vende pune. Më pas vjen Përmeti me 8 vende, Memaliaj me 7 vende, Dropulli e Tepelena me 6 dhe Libohova e Këlcyra me 2 vende. Mes ndërmarrjeve të bashkuara në një shoqëri të vetme, më mirë performon Gjirokastra për shkak të rrjetit të ri të ujësjellësit dhe menaxhimit efikas që i është bërë vitet e fundit. Performancë më të keqe kanë Libohova, Memaliaj e Këlcyra.
Shkurtimi i vendeve të punës është vetëm hapi i parë i një faze të re në të cilën do të hyjë menaxhimi i shoqërive të ujësjellësave në Shqipëri. Me gjasë në një kohë të afërt këto kompani publike do të jepen me koncension tek bizneset private. Kjo formë administrimi është parashikuar edhe në ligj e duket se drejt kësaj do të shkohet.
Me siguri qëllimi final i krijimit të shoqërive të përbashkëta të ujësjellësave një vit më parë ka qenë pikërisht ky, të shkohet drejt dhënies së tyre me koncension. Presioni qeveritar ishte i lartë ndaj kryebashkiakëve për të firmosur pa kushte e rezistencë dorëzimin e këtyre kompanive publike te Ministria e Infrastrukturës dhe Energjitikës.
Sa i përket largimit nga puna të 43 punonjësve, mësohet se komunikimi do t’u bëhet nga shoqëria në fillim të vitit të ardhshëm. Gjirokastra në tërësi si qark është goditur shumë vitet e fundit nga mbyllja apo transferimi i disa institucioneve publike ku punonin jo pak njerëz e ku merreshin shërbime. E fundit në listë që u “asgjësua” ishte Gjykata e Apelit. ©Argjiroja.net
