Një super Rabiot dhe “muri” Mike Maignan i dhurojnë Milan një 3-pikësh të artë në transfertë përballë Como-s, një fitore e madhe që mban “djallin” në garë për titull, nuk lejon Inter të arratiset duke ngushtuar diferencën në vetëm 3 pikë me rivalin e përjetshëm.
Ekipi i Allegrit triumfoi 3-1 me përmbysje, në një kohë kur ishin vendasit që kaluar të parët në avantazh që në minutën e 10-të. Stafetën më pas e mori Mike Maignan, me portierin francez që mbajti Milan në lojë me të paktën tre raste flagrante vetëm gjatë pjesës së parë, një paraqitje fantastike e kapitenit duke vërtetuar edhe një herë rëndësinë jetike të tij, jo më kot Igli Tare po bën gjithçka për t’i rrëmbyer firmën për rinovimin e kontratës. Me Maignan që bëri pjesën e tij, Milan u rikthye në lojë në minutën e 45-të ku Rabiot fitoi një 11-metërsh. Nga pika e bardhë, Nkunku u tregua i saktë duke barazuar shifrat në 1-1.
Me fillimin e pjesës së dytë, Maignan vuri në jetë një tjetër mrekulli, ku në minutën e 50-të devijoi një goditje të Nico Paz. Me Como-n që hasi në një “mur” të vërtetë, si rrallë herë, Milan u tregua perfekt në fazën ofensive ku në minutën e 55-të, Leao dhuroi një asist për Rabiot, me francezin që me një goditje të saktë brenda në zonë realizoi golin e dytë për “djallin”. Como tentoi në çdo formë të rikthehej në lojë, por ishin dhe të pafat. Për të hipotekuar këtë fitore të Milan mendoi sërish Rabiot, me francezin që lëshoi një predhë në distancë duke realizuar golin e tretë për kuqezinjtë dhe të dytin personal duke kompletuar në këtë mënyrë mbrëmjen e tij të madhe. Falë këtij suksesi, Milan përforcon pozitat në vendin e dytë, në kuotën e 43 pikëve, 3 më shumë se Napoli dhe -3 në raport me Inter.
Max Allegri shijon këtë fitore, por sërish nuk preferon të flas për titull, nuk e sheh këtë sukses si një përgjigje ndaj Inter:
“Jo, kjo nuk ishte një përgjigje ndaj askujt. Ne kemi rrugëtimin tonë. Të rikthehemi në Champions sezonin e ardhshëm do të ishte e rëndësishme për Milan, mendojmë vetëm për këtë objektiv”, u shpreh Allegri. “Djalli është. Milan i përgjigjet Inter, rikthehet diferenca në -3”, shkruan La Gazzetta dello Sport në faqen e parë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
