Në Shqipëri janë shtuar rastet me zgjebe. Mjekja dermatologe, Erjona Shehu tha sot për Top Channel se zgjebja është rizgjuar dhe se rastet e kësaj sëmundjeje tepër ngjitëse janë shtuar.
Sipas mjekes personat që preken më shumë nga zgjebja janë adoleshentët. Mjekja thotë se tashmë raste me zgjebe ka edhe te shtresat e mesme dhe të larta dhe se në stinën e dimrit rastet janë më të shumta.
Kontakti drejtpërdrejt fizik, një dhënie dore e zgjatur, marrëdhëniet seksuale, përdorimi i rrobave të një individit që është infektuar nga zgjebja janë mënyrat kryesore përmes së cilave përhapet sëmunnja ngjitëse sipas mjekes.
“Por tashmë ajo që na bën më shumë çudi e shohim në shtresat e mesme dhe lart. Shohim që ka një përhapje, nuk është më diferencuese apo vetëm tek masat higjienike, që ne marrim në ambientet tona. Gjëja e parë që mendohet dhe që ka të bëjë me periudhën post pandemisë ka qenë shumë të mbyllur dhe të izoluar njerëzit me njëri-tjetrin dhe zgjebja e ka specifikën e vetë që gjatë periudhës së dimrit që ne rrimë të mbyllur, ka një përhapje më të madhe, rrobat ndërrohen më pak, ka më pak efekte të diellit. Po pastaj një tjetër faktor që mendohet se ka të bëjë me zgjebën është edhe fakti që ne po shohim rezistencë karshi mjekimit tek pacientët me zgjebe. Kanë filluar të mos jenë në efikase siç kanë qenë më parë. Përgjithësisht është kontakti drejtpërdrejt fizik, një dhënie dore e zgjatur, jo dhënie dore çkemi, çfarë bërë, përqafimi, marrëdhënie seksuale, përdorimi i rrobave të një individit që është infektuar nga zgjebja, mund të jetë përdorimi i shtretërve, peshqirët, sendet personale etj. Të gjitha këto duhet të izolohen për 96 orë, të futen në një qese të zezë dhe të qëndrojnë në errësirë për 96 orë”, u shpreh mjekja Erjona Shehu.