Problemet me dëmtimet vazhdojnë të ndjekin skuadrën e Interit, e cila përgatitet për sfidën e radhës në kampionat, atë ndaj Bologna-s. Trajneri Simone Inzaghi duhet të bëjë llogaritë pa disa nga lojtarët kryesorë.
Një nga mungesat kryesore është Mkhitaryan, i cili ka lënë pas dëmtimin e pësuar në derbin kundër Milanit, por ende nuk është në gjendjen e duhur për të zbritur në fushë dhe do të duhet të presë rikthimin e tij në javët e ardhshme.
Një tjetër mungesë e rëndësishme për zikaltërit është edhe ajo e Hakan Çalhanoglu. Mesfushori turk vazhdon të ketë shqetësime dhe stafi mjekësor nuk dëshiron të rrezikojë me aktivizimin e tij, duke e lënë jashtë grumbullimit për këtë sfidë.
Në këtë situatë, një tjetër mundësi vjen për mesfushorin shqiptar Kristjan Asllani, i cili pritet të luajë sërish si titullar. Asllani ishte ndër më të mirët në fushë në ndeshjen e fundit kundër Venecias, ku tregoi aftësi të shkëlqyera si në ndërtimin e lojës ashtu edhe në mbrojtje. Trajneri Inzaghi i ka besuar regjinë shqiptarit, i cili ka një tjetër mundësi të artë për të konfirmuar vlerat e tij dhe për të konsoliduar vendin në formacion.
Në repartin e mbrojtjes, situata duket pak më e qëndrueshme. Acerbi është rikuperuar nga shqetësimet që kishte dhe do të jetë i gatshëm për këtë përballje, edhe pse fillimisht pritet të qëndrojë në stol. Në krahun tjetër, mbrojtësi i ri Bisek do të mungojë të paktën për dhjetë ditë, duke i lënë trajnerit më pak opsione për rotacion.
Përballja ndaj Bolonjës nuk do të jetë aspak e lehtë për Interin, pasi skuadra e drejtuar nga Vicenzo Italiano ka treguar një formë të mirë këtë sezon dhe ka qenë një kundërshtar i fortë edhe për ekipet kryesuese të kampionatit.
Ndeshja mes Interit dhe Bologna-s, është planifikuar të luhet ditën e mërkurë, duke nisur nga ora 20:45.
