Një ditë me diskutime politike është zhvilluar në qarkun e Gjirokastrës, ku deputetët dhe drejtuesit e Partisë Socialiste kanë diskutuar për angazhimet dhe punën që i pret në sezonin e ri politik.
Drejtuesja politike e PS-së për qarkun e Gjirokastrës, njëkohësisht ministre e Arsimit, Mirela Kumbaro, thekson se fokusi kryesor do të jetë forcimi i pranisë në territor dhe një komunikim më i drejtpërdrejtë me qytetarët, në çdo bashki dhe komunitet.
Sipas Kumbaros, objektivi është që përfaqësuesit politikë të jenë çdo ditë më pranë njerëzve, duke dëgjuar më mirë problematikat e tyre, duke reaguar në kohë dhe duke mbajtur përgjegjësi për angazhimet e marra.
“Prania besnike” në territor, nga Memaliaj në Dropull, nga Këlcyra në Tepelenë, nga Përmeti në Libohovë e Gjirokastër, do të jetë një prej shtyllave të punës politike në qark, shprehet Kumbaro.
Në reagimin e saj, ajo e lidh këtë qasje edhe me dokumentin “BESA”, si një angazhim për fjalën e mbajtur dhe përgjegjësinë ndaj qytetarëve.
Një tjetër element i rëndësishëm i qasjes së re është “Pasqyr Albania”, që sipas Kumbaros synon të sjellë një mënyrë të re të marrëdhënies me qytetarët, përmes më shumë komunikimit, transparencës dhe përgjegjshmërisë.
“Pasqyr Albania është një mënyrë e re për ta kthyer këtë marrëdhënie me qytetarët në më shumë komunikim, më shumë përgjegjshmëri dhe shërbime më të mira për njerëzit që përfaqësojmë”, shprehet ajo.
Për drejtuesit socialistë të qarkut, sezoni i ri politik pritet të shoqërohet me një intensifikim të punës në terren dhe me një vëmendje më të madhe ndaj problematikave konkrete të komuniteteve, duke synuar që komunikimi me qytetarët të jetë i vazhdueshëm dhe angazhimet politike të përkthehen në përgjegjësi konkrete.
Me mesazhet “Prani Besnike”, “BESA” dhe “Pasqyr Albania”, Kumbaro vendos në qendër të sezonit të ri politik raportin me qytetarët, praninë në territor dhe mbajtjen e përgjegjësisë për fjalën e dhënë.
