Funerali i ekstremistit grek Kostandinos Kacifas në fshatin Bularat, sikundër u pa nga të gjithë, për fat të keq u shndërrua në një manifestim antishqiptar me thirrje raciste dhe nacionaliste, që nuk bëjnë gjë tjetër veçse krijojnë një klimë jo të mirë mes dy popujve tanë. Për këtë nuk ka asnjë dyshim! Me zë dhe figurë, ditën për diell, i pamë ekstremistët e ardhur nga përtej kufirit dhe jo vetëm, teksa në kor thërrisnin: “Sqepar dhe flakë për qentë shqiptarë”; ‘Hakmarrje”; “Gjaku na thërret ta djegim shqiptarin” e të tjera thirrje pjellë e fantazisë së sëmurë nacionaliste.
Si shumë të tjerë në atë funaral, këto thirrje sigurisht që i kanë dëgjuar edhe dy deputetë të Kuvendit të Shqipërisë; Vangjel Tavo dhe Vangjel Dule. I pari është deputet i qarkut Gjirokastër dhe ish-ministër i Shëndetësisë. I dyti ka qenë nënkryetar i Kuvendit të Shqipërisë. Bashkë me ta ishin edhe dy ish-ministra të Shqipërisë; Kosta Barka dhe Spiro Ksera. Natyrisht që ndoshta Tavo dhe Dule ishin të pafuqishëm të ndalonin ekstremistët në ‘masturbimin’ me thirrje raciste kundër shqiptarëve.
Por çfarë bënë më pas? A pati një deklaratë nga Tavo dhe Dule, për t’i dënuar këto thirrje? Deri më tani asnjë reagim dhe me siguri nuk ka për të patur. Dule ishte shumë i shqetësuar për 12 ekstremistët që u shoqëruan nga policia e Gjirokastrës dhe shkoi në komisariat të interesohej për ta. Sigurisht në të drejtën e vet si bashkobas me të ndaluarit. Por nuk shprehu asnjë keqardhje që në funeral kishte thirrje antishqiptare, nuk bëri asnjë deklaratë për t’i dënuar këto thirrje.
Ndërkohë Tavo nga tjetër më shumë dukej i preokupuar të sajdiste eurodeputeten qipriote, e cila një ditë më parë u shpall ‘non-grata’ nga Tirana zyrtare dhe që njihet gjithashtu si një personazh kontrovers dhe me qëndrime ekstremiste karshi Turqisë, vend ku është ndaluar nga policia 7 vjet më parë. As Tavo, i cili është në Kuvendin e Shqipërisë prej 20 vitesh, jo vetëm me rreth 2 mijë votat e Dropullit sepse aq vota s’i japin dot mandat, nuk i ka dënuar thirrjet raciste kundër shqiptarëve.
Çfarë i kushton Vangjel Tavos dhe Vangjel Dules të distancohen nga ekstremistët që e shndërruan funeralin e Kacifas në një manifestim antishqiptar? Një deklaratë për dënimin e atyre thirrjeve, nuk interpretohet për keq nga minoritarët në Dropull, nuk do të thotë ‘prerje ne besë’. Vetë Tavo, Dulja dhe gjithë ne të të tjerët e dimë shumë mirë se minoriteti grek në Dropull dhe mbarë Shqipërinë, nuk janë Kostandinos Kacifas, nuk janë as Babi Karathano apo turma e ekstremistëve patologjikë që ushqejnë urrejtjen për shqiptarët. Minoriteti grek në Shqipëri është një nga pjesët më të emancipuara të shoqërisë tonë dhe si i tillë nuk mund të përdoret nga ekstremistët andej e këtej kufirit.
Çfarë halli ka Tavo e Dule që nuk i dënojnë ato thirrje? Humbasin vota në minoritet? Dulja ka rreth 15 vjet që nuk hyn në Kuvendin e Shqipërisë me votat e minoritetit sepse ky i fundit nuk mbështet retorikën dhe qëndrimet e tij. Kreu i PBDNJ është deputet herë nga lista e PS e herë nga lista e PD. Në zgjedhjet e fundit madje, ishte në listë bashkë me çamin Dashamir Tahiri. Ndërkohë Tavo është deputet prej 20 vitesh sepse ka marrë vota në Gjirokastër, Libohovë, Tepelenë e Përmet. Derisa nuk ka një deklaratë ku të distancohen nga thirrjet antishqiptare në Bularat, Vangjel Tavo dhe Vangjel Dule miratojnë në heshtje ato që u thanë aty; “Sqepar dhe flakë për qentë shqiptarë”; ‘Hakmarrje”; “Gjaku na thërret ta djegim shqiptarin”
©ArgjiroLajm.net
