Drejtoria e Tatimeve u dërgoi dje mediave një reagim publik për deklaratat fyese të Erion Braçes ndaj punës së Administratës Tatimore, ndërsa 24 orë më pas vetë drejtori i Përgjithshëm, Ceno Klosi detyrohet çuditërisht t’i kërkojë falje deputetit socialist.
“Na vjen keq të dëgjojmë nga një Deputet fyerje dhe mungesë respekti ndaj Administratës Tatimore, duke përdhosur punën e saj, aq më keq me informacione të pavërteta, gjykime të një Deputeti që jo vetëm nuk e përmirësojnë punën e një Administrate, por përkundrazi e ofendojnë publikisht atë me apo pa të drejtë”, thuhej ndër të tjera në njoftimin e Drejtorisë së Tatimeve.
Erion Braçe ditët e fundit ka denoncuar vazhdimisht se tregjet e fruta-perimeve janë në treg të lirë dhe kryejnë grabitje masive. Madje, sipas tij në këto tregje mungojnë plotësisht edhe faturat tatimore.
Si kundërpërgjigje, Drejtoria e Përgjithshme e Tatimeve u dërgoi mediave një reagim të fortë dhe i bënte me dije deputetit Erion Braçe se ai vetë ka qenë personalisht i angazhuar në luftën kundër Evazionit, dhe pavarësisht kësaj lufte disa vjeçare fenomeni ka vazhduar.
Mirëpo, 24 orë pas kësaj deklarate, drejtori i Përgjithshëm ka dalë me një deklaratë të dytë që i drejtohet përsëri Erion Braçes, por këtë herë i kërkon ndjesë publikisht për kundërpërgjigjen e djeshme.
“Në emër të Drejtorisë së Përgjithshme të Tatimeve dhe në emrin tim personal, i kerkojmë ndjesë publike deputetit Erjon Braçe për reagimin e nxituar dhe aspak institucional ndaj kritikave të tij publike.
Shqetësimet e deputetit meritojnë vëmendjen e institucionit tonë dhe nuk është detyra jonë të replikojmë me askënd që lirisht jep opinionin e vet. Kjo thyerje e etikës institucionale nuk do të përsëritet. Shpresoj në mirëkuptimin e të gjithëve për sa më lart. Ceno Klosi”, thuhet në deklaratën e Drejtorisë së Përgjithshme të Tatimeve.
