Lionel Messi përgatitet për ndeshjen e fundit me fanellën e Argjentinës. Në moshën 39-vjeçare, “Pleshti” do të zbresë në fushë ndaj Beninit,të mërkurën në orën 1 të mëngjesit me orën evropiane, në një mbrëmje që pritet të jetë emocionuese për kampionin e botës dhe miliona tifozët e tij, anembanë rruzullit.
Pas më shumë se dy dekadash me kombëtaren, Messi mbyll një epokë të jashtëzakonshme, të shoqëruar me 125 gola, rekorde dhe trofe. Debutimi i tij erdhi në vitin 2005, ndërsa momenti më i madh ishte triumfi në Botërorin e Katarit në vitin 2022, kur Argjentina ngriti Kupën e Botës pas një finaleje dramatike ndaj Francës.
Messi ka marrë pjesë në gjashtë Botërorë dhe është shndërruar në simbolin e një brezi të tërë të futbollit argjentinas. Pas shumë zhgënjimeve dhe finaleve të humbura, ai arriti më në fund të realizonte ëndrrën e madhe me fanellën bardhekaltër.
Përballë Beninit, trajneri Scaloni pritet t’i besojë Messit të gjithë ndeshjen, duke i dhënë mundësinë për një lamtumirë të denjë. Në Monumental, rreth 80 mijë tifozë do të jenë aty për të përshëndetur për herë të fundit kapitenin dhe numrin 10.
Ndërkohë në Rosario në qytetin e tij të lindjes, tifozët e shumtë argjentinas kishin përgatitur një dekor të jashtëzakonshëm, duke shpalosur një fanellë gjigande me numrin 10, për të përshëndetur për herë të fundit idhullin e tyre.
Një kapitull i madh i historisë së Argjentinës po mbyllet. Messi largohet nga kombëtarja, por pas vetes lë një trashëgimi që do të mbetet gjatë në historinë e futbollit.
