Shqipëria është goditur nga një tërmet i fuqishëm në orët e para të mëngjesit të sotëm, ku fatkeqësisht deri tani raportohet për 20 viktima, dhe qindra të lënduar. Ndërkohë, nën rrënoja ende ndodhen shumë persona, ndërsa ekipet e shpëtimit vijonë kërkimet për të shpëtuar jetë njerëzore. Tërmeti ka shkaktuar edhe shumë të pastrehë, pasi janë shembur pallate dhe shtëpi në Durrës, Thumanë e Kurbin.
Në Thumanë, aty ku paraqitet edhe situata më dramatike, një grua e moshuar humbi jetën pasi u zu nën rrënoja. Një skenë rrëqethëse ku nuk mund t’i mbash dot lotët. Në prehërin e saj, të afërmit dhe forcat zjarrfikëse nxorrën gjallë nipin e vogël.
Në Thumanë janë shembur totalisht tre pallate, dhe nën rrënoja ka disa persona për të cilit forcat zjarrfikëse po punojnë për t’i nxjerrë gjallë, me shpresën e madhe. Edhe në Durrës ku dëmët janë të shumta, tre të pajetë u nxorrën nga rrënojat e pallateve të shembur, ndërsa një u gjet tek Vila Palma në Durrës. Në Kurbin një tjetër person humbi jetën, pasi i kapur nga paniku në tentativë për t’i shpëtuar lëkundjeve të fuqishme që u ndjenë, është hedhur nga ballkoni. Ai humbi jetën si pasojë e lartësisë nga kati i tretë. Po në Kurbin, një tjetër person, ndërroi jetë pasi duke drejtuar automjetin humbi kontrollin duke u përplasur për vdekje.
Po ashtu mësohet se tërmeti ka rrafshuar edhe hotelin me 5 kate, “Mira Mare” në Durrës. Më poshtë sjellim foto sesi ka qënë dhe si është rrafshuar sot hoteli.
