Magazina me 18 tonë makarona të skaduara në Gjirokastër nuk bën me përgjegjësi vetëm Autoritetin Kombëtar të Ushqimit, i cili nuk e kishte zbuluar në kohë. Por duket se pjesë e dështimit spektakolar në evidentimin e këtij rasti është edhe Drejtoria Rajoanle e Tatimeve në Gjirokastër apo Hetimi Tatimor. Të paktën kjo kuptohet nga njoftimi që ka shpërndarë sot për mediat Policia e Shtetit.
Ndër të tjera thuhet se mallrat ushqimore dhe industriale të gjetura në magazinën e subjektit ‘Vaka Treg’ Sh.p.k ishin “pa etiketa në gjuhë shqipe dhe të padeklaruara në organet tatimore”. Pikëpyetjet që ngrihen në këtë rast: Si është e mundur që këto mallra të magazinohen dhe më pas shpërndahen në treg, duke mos qenë të deklaruara në Tatime dhe duke mos patur etiketa në gjuhën shqipe? Cfarë ka bërë Drejtoria e Tatimeve në Gjirokastër dhe Hetimi Tatimor?
A ishin në dijeni Tatimet për këtë magazinë? Përgjigjet mbase do të dalin nga hetimi i Prokurorisë, gjithmonë nëse i shkohet deri në fund këtij hetimi. Por intuita nga të dhënat e para, të thotë se këtu ka përgjegjësi jo vetëm AKU Gjirokastër, por edhe Drejtoria Rajonale e Tatimeve. Kallëzimi në prokurori është bërë ndaj shtetasit Mihal Barka, si administrator i magazinës. Ndërsa skandali u denoncua në emisionin investigativ ‘Stop’ në Tv Klan.
© ArgjiroLajm.net
