Shqiptarët solidarizohen nga tragjedia. Disa persona të ndryshëm kanë hapur llogari të ndryshme bankare në faqen “Gofund” për t’u ardhur në ndihmë të prekurve nga tërmeti me magnitudë 6.4, i cili ka tronditur vendin mëngjesin e sotëm.
Vetëm njëri prej fondeve të ngritura me bazë në New York ka arritur shumën $303,494 ndërsa të tjerë gjithashtu arrijnë të grumbullojnë të ardhura. Një shembull ku i solidaritetit të Diasporës me të prekurit që më së shumti vijnë nga Durrësi.
22 të vdekur, mbi 600 të plagosur, dhe dhjetëra të tjerë nën rrënoja, është ky bilanci i një ditë që do të mbahet mend gjatë si tragjedia e 26 nëntorit 2019. Epiqendra e tërmetit ishte qyteti i Durrësit, dhe konkretisht zona e Thumanës, ku ka patur 3 pallate të shembura, ndërkohë që problemet nuk mungojnë as në Fushë-Krujë, apo te Kavalishenca, ku mbeti i vdekur kryekomisari Bajram Hajdarmataj.
Gjithë shteti ndërkohë është në Durrës, ku po punohet për të shpëtuar jetët që ndodhen nën rrënoja. Ndërkohë, që edhe lëkundjet nuk kanë ndaluar. Herë pas here, me magnitudë shumë më të ulët dhe me fuqi më të vogël goditjeje, toka në Tiranë dhe Durrës vijon të dridhet.