Kualifikimi i Dinamos në çerekfinalen e Kupës së Shqipërisë, i ka kushtuar rëndë bluve duke qenë se kanë humbur shërbimet e Bekim Maliqit. Mbrojtësi i djathtë u dëmtua që në mesin e pjesës së parë duke u detyruar që të largohet me barelë nga fusha e lojës dhe ditën e djeshme, i është nënshtruar një rezonance magnetike.
Për fat të keq, ka rezultuar që dëmtimi të jetë aq i rëndë sa edhe mendohej në fillim, pasi mbrojtësi nga Kosova, ka këputur ligamentin krocat. Një dëmtim i tillë, është një nga dëmtimet më të rënda që futbollistët pësojnë dhe për këtë arsye, sezoni i Maliqit konsiderohet i mbyllur pasi për rikuperimin e tij, nevojiten rreth 6 muaj apo edhe më shumë.
Mbrojtësi do t’i nënshtrohet një ndërhyrjeje kirurgjikale e më pas, do të duhet të pushojë për disa javë para se të nisë terapinë dhe stërvitjen individuale ku fillimisht do të ketë fizioterapi, ushtrime e vetëm në javët e fundit para rikthimit, do të zbresë në fushën e blertë. Te Dinamo, shpresojnë që Maliqi të jetë i gatshëm për fillimin e sezonit të ri duke qenë se ky sezon dhe Europa, janë praktikisht të vështira ose edhe të pamundura, pasi rikthimi i nxituar në situata të tilla, do të çonte në një dëmtim edhe më të rëndë.
ZËVENDËSIMI- Dinamo ka mungesa në krahun e djathtë të mbrojtjes dhe aktualisht, vetëm Meksi është mbrojtës në atë krah. Në kushte të tilla, Dinamo do të kërkojë me patjetër ndërhyrje në merkato për të plotësuar repartin e prapavijës, duke parë se sezoni është i gjatë dhe nuk kanë përfunduar as gjysmat e ndeshjeve, duke përfshirë këtu edhe Kupën e Shqipërisë dhe “Final 4”. Kështu, ditët në vijim pritet që Dinamo të afrojë në skuadër mbrojtës të djathtë për të mos pasur shqetësime në vazhdimësi të sezonit, megjithëse në këtë pikë të kampionatit, alternativat në treg nuk janë të shumta.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
