Universiteti “Eqrem Çabej” hapi sot zyrtarisht dyert për vitin e ri akademik 2025 – 2026, duke mirëpritur me krenari studentët e rinj që i bashkohen familjes sonë akademike. Në një ceremoni të organizuar me këtë rast morën pjesë drejtues të universitetit dhe autoritete lokale.
“Mesazhi i përbashkët i kësaj dite ishte i qartë: Arsimi është çelësi për të hapur dyert e së ardhmes dhe Universiteti “Eqrem Çabej” është shtëpia ku kjo e ardhme ndërtohet. Të dashur studentë rishtarë! Sot për ju nis një udhëtim që do t’ju sfidojë, do t’ju frymëzojë dhe do t’ju forcojë. Guxoni të ëndërroni më shumë, të pyesni më shumë dhe të besoni se çdo hap në këtë universitet është një hap drejt një të ardhmeje më të mirë. Ju urojmë një vit të mbushur me dije, frymëzim dhe arritje! Më të mirët e të ardhmes jeni ju“, thuhet ne nje njoftim te universitetit.
Më tej njoftohet se gjatë Javës së Orientimit, studentët do të kënë mundësi të marrin më shumë informacion mbi universitetin dhe stafin akademik.
“Gjatë Javës së Orientimit, studentët e vitit të parë po njihen me auditorët, laboratorët modernë dhe shërbimet që do t’i mbështesin në çdo hap të rrugëtimit të tyre akademik. Aktivitetet organizohen nga Zyra e Këshillimit të Karrierës në bashkëpunim me departamentet akademike, me synimin që studentët të njihen më mirë me: ✅ Programet e tyre të studimit ✅ Mundësitë për zhvillim akademik dhe praktikë profesionale ✅ Shërbimet që ofron universiteti ✅ Aktivitetet studentore dhe jetën universitare në UGJ Këto ditë janë një mundësi për të marrë përgjigje, për të njohur më nga afër stafin akademik dhe për të nisur këtë rrugëtim të ri me më shumë siguri dhe besim”, thuhet ne njoftim.
