Për herë të parë gjatë dekadës së fundit po shtohet interesi për të studiuar në Universitetin e Gjirokastrës. Këtë vit ka një rritje të aplikimeve të reja me 30% krahasuar me vitin e kaluar dhe ky është trendi më pozitiv që prej vitit 2010 kur nisi dhe rënia e numrit të studentëve.
Rektori i universitetit “Eqrem Çabej” , Bektash Mema tha për Top Channel, se rritja e numrit të aplikantëve në Gjirokastër vjen si rrjedhojë e studimit që ka bërë Universiteti për hapjen e programeve që i shërbejnë tregut të punës. Kjo gjë është reflektuar në rritjen e kërkesave.
Një pjesë e maturantëve janë orientuar drejt programeve që ka kanë treg pune. Kërkesa më e madhe është për programet profesionale 2-vjecare, ku shkojnë maturantë me mesatare nën notën 6. Në këtë kuptim s’ka vend për mburrje dhe as nuk mund të pretendohet se është bërë ndonjë punë e mirë nga drejtuesit e këtij universiteti.
Rritja e numrit të studentëve nga pikëpamja sasiore, por jo cilësore, i shërben kastës së pedagogëve të korruptuar që duan të ruajnë status quonë në atë universitet. S’ka vend për lavdi dhe as për të marrë merita, kur pjesa më e madhe e atyre që duan të studiojnë në Universitetin e Gjirokastrës janë maturantë me mesatare nën notën 6, të cilëve u duhet thjesht një diplomë dhe kërkojnë të jenë të angazhuar me dicka gjatë dy viteve të studimit.
Universiteti i Gjirokastrës është rrënuar. Ka nevojë për ‘shkundje’ dhe rithemelim. Por për fat të keq nuk e bëjnë dot ata që e katandisën në këtë gjendje.
