Për ngjarjen e rëndë në Gjirokastër ku 16-vjeçarja Irsa Muçollari u vetëvra ka ende mister. Motivet se kush e shtyu adoleshenten drejt aktit të rëndë nuk dihen ende. Deri më tani kanë folur më shumë mediat dhe prindërit e së ndjerës në dy intervista televizive në televizionet kombëtare.
Prokuroria e cila ka barrën e madhe të zbardhjes së ngjarjes nuk e ka thënë ende fjalën e saj të fundit. Natyrisht që hetimi mund të jetë kompleks dhe kërkon kohën e vet. Janë ekspertët që duhet të vlerësojnë mirë gjithë detajet, faktet, provat, dëshmitë dhe ngjarjen në tërësi.
Por nëse ngjarja futet në “kalendat greke” si shumë e shumë dosje të tjera që “flenë” në sistemin tonë të drejtësisë, jo vetëm që nuk do të qetësohet as familja e Irsa Muçllarit, por kanë për të vijuar sulmet dhe histeria mediatike edhe kundër shkollës e mësuesve apo nxënësve të tjerë të gjimnazit “Siri Shapllo”.
Shkolla dhe mësuesit mund të jenë krejt pa asnjë faj në ngjarjen e rëndë ose kanë përgjegjësinë që nuk njoftuan familjen për largimin e Irsës nga shkolla, por për të shmangur gjithë këto pandehma do duhet që fjalën e fundit ta thotë Prokuroria e Gjirokastrës më herët sesa vonë.
A ishte vërtet bullizmi motivi që e shtyu 16-vjeçaren drejt aktit të rëndë apo ka të pathëna të tjera? Kjo është një pyetje që do duhet të marrë përgjigjen ligjore nga hetimi i prokurorisë. Deri atëhere çdo sulm dhe intimidim që iu bëhet mësuesve të gjimnazit “Siri Shapllo” apo bashkëmoshatarëve të Irsës ngjan të jetë i tepërt.
Sigurisht që në jo pak herë presioni i opinionit publik dhe mediave ka ndikuar pozitivisht në zbardhjen e ngjarjeve, por ka edhe plot raste kur abuzimi në emër të biznesit të klikimeve, sensacionit mediatik apo gjithëfarë motiveve të tjera merr udhë e nuk ndalet.
Prokuroria duhet ta zbardhë ngjarjen pa vonesa të paarsyeshme duke qetësuar shpirtin e trazuar të familjes Muçollari, mësuesit dhe nxënësit e gjimnazit “Siri Shapllo” dhe krejt opinionin publik në Gjirokastër e mbarë vendin. Kush e shtyu Irsën drejt vetëvrasjes, bullizmi i shoqërisë siç është trumbetuar me të madhe gjithë këto ditë apo ndonjë motiv tjetër? ©Argjiroja.net
