Policia e Gjirokastrës ka dhënë detaje lidhur me të riun që u gjet i pajetë në ambientet e Mitropolisë. Në njoftimin e shkurtër për mediat thuhet se dyshimet janë që 21-vjeçari të ketë gjetur vdekjen për shkak të mbidozës së ilaceve që po merrte.
NJOFTIMI
Më datë 16.01.2025, rreth orës 09:55, në tualetet e konviktit të një shkolle private, në lagjen “11 Janari”, është gjetur pa shenja jete dhe pa shenja dhune, shtetasi S. Sh., 21 vjeç, banues në Durrës. Nga veprimet e para hetimore dyshohet se ka humbur jetën si pasojë e mbidozës së ilaçeve që 21 vjeçari merrte për shkak të depresionit. Grupi hetimor nën drejtimin e Prokurorisë po punon për sqarimin e rrethanave dhe shkakut të humbjes së jetës.
I ndjeri, një i ri nga Myzeqeja, ishte jetim dhe ishte rritur në Qendrën e Kujdesit në Shën Vlash, Durrës. Ai ishte student i Fakultetit të Teologjisë në Akademinë “Logos” në Durrës dhe kishte ardhur në Gjirokastër për një vizitë në vendin ku kishte përfunduar shkollën e mesme.
