Në Formula 1 nuk fitohet vetëm falë performancës së makinave dhe ideve inovative që respektojnë rregulloren. Fitorja mund të vijë edhe përmes sigurimit të një trajtimi të barabartë nga Federata Ndërkombëtare për zgjidhje të caktuara teknike.
Pikërisht këtë ka arritur Ferrari lidhur me një koncept që skuadra kishte testuar gjatë provave para sezonit dhe për të cilin kishte kërkuar miratimin e FIA-s, por pa sukses. Ky refuzim, megjithatë, u kthye më vonë në një armë të rëndësishme kundër një rivali të drejtpërdrejtë, Mercedesit.
REFUZUMI PËR FERRARIN – Ferrari kishte eksploruar mundësinë e përdorimit të një konfigurimi specifik të difuzorit, i cili më pas u integrua pjesërisht në paketën e prezantuar në Barcelonë. Inxhinierët e “Kokëkuqes” kishin shtuar profile aerodinamike në skajin e daljes së difuzorit, duke rritur zonën e zgjerimit të tij dhe duke përmirësuar nxjerrjen e ajrit nga pjesa e poshtme e makinës. Kjo zgjidhje synonte gjithashtu menaxhimin më efikas të rrjedhës së ajrit drejt krahut të pasmë, ndërsa krijimi i vorbullave specifike do të mundësonte një lloj ndalimi të difuzorit në vijat e drejta dhe një efikasitet më të madh aerodinamik për SF-26.
MODIFIKIMI I MERCEDESIT – Në Kanada, Mercedesi prezantoi një paketë të gjerë përditësimesh, ku përfshihej edhe një rishikim i pjesës së poshtme të makinës dhe veçanërisht i difuzorit në pjesën e pasme. Versioni i ri i “W17” përfshinte profile shtesë në skajin e daljes së difuzorit, duke përdorur në thelb të njëjtin koncept për të cilin Ferrari kishte kërkuar miratimin e FIA-s gjatë dimrit. Kjo e shtyu Ferrarin të kërkonte shpjegime nga Federata, se pse kjo zgjidhje ishte ndaluar për ta, por jo për Mercedesin?
Gjatë javëve të fundit, pas garave në Kanada, Monako dhe Spanjë, janë zhvilluar diskutime, shkëmbime dokumentesh dhe analiza teknike mbi ligjshmërinë e difuzorit të “W17”. Vendimi përfundimtar i FIAs, i shpërndarë sipas procedurës standarde tek të gjitha skuadrat, konfirmon se koncepti i përdorur nga Mercedesi nuk është në përputhje me rregulloren. Sipas Federatës, profilet shtesë zgjeronin në mënyrë efektive volumin aerodinamik të difuzorit, çka bie ndesh me rregullat aktuale. Për këtë arsye, zgjidhja nuk do të lejohet më në gara.
PASOJAT PËR MERCEDESIN – Vendimi hyn në fuqi menjëherë, megjithëse FIA ka lejuar Mercedesin dhe çdo skuadër tjetër që mund të ketë adoptuar të njëjtin koncept të kryejnë modifikimet e nevojshme brenda afateve teknike të arsyeshme. Sipas informacioneve që qarkullojnë në bokset e Formulës 1, Mercedesi pritet të sjellë versionin e ri dhe të ligjshëm të difuzorit në Angli, fundjavën e ardhshme.
Në pistën e shkurtër të “Red Bull Ring” në Austri, përdorimi i konfigurimit të ndaluar nuk pritet të sjellë ndonjë avantazh të dukshëm. Megjithatë, situata ndryshon ndjeshëm në Silverston. Pista britanike kërkon nivele shumë të larta efikasiteti aerodinamik dhe ngarkese të gjeneruar nga fundi i makinës. Rikalibrimi i të gjithë paketës aerodinamike pas heqjes së kësaj zgjidhjeje mund të përbëjë një sfidë serioze për Mercedesin, në një moment kyç të sezonit ku çdo detaj mund të bëjë diferencën.
